فرمان الہی
نماز کے اوقات
کراچی میں زمینی راستے سے زائرین کے کربلا جانے پر پا بندی کے خلاف مجلس وحدت مسلمین (ایم ڈبلیو ایم) کا مارچ عارضی طور پر روک دیا گیا۔
شاہراہِ پاکستان انچولی سے شروع کیا گیا اربعین حسینی مارچ عارضی طور پر روک دیا گیا ہے۔
گورنر سندھ کامران ٹیسوری نے نمائش چورنگی پہنچ کر ایم ڈبلیو ایم کے رہنماؤں سے ملاقات کی اور یقین دہانی کروائی کہ ان کے مطالبات آج دوپہر تک حل کروانے کی ہر ممکن کوشش کریں گے۔
گورنر سندھ نے کہا کہ امریکا میں وزیر داخلہ محسن نقوی سے بات ہوئی ہے۔ محسن نقوی نے کہا کہ سیکیورٹی خدشات ہیں۔ کامران ٹیسوری اور ایم ڈبلیو ایم رہنماؤں کے آج حتمی مذاکرات ہوں گے۔
کامران ٹیسوری کا کہنا ہے کہ وہ کوشش کریں گے عراقی ویزے کی مدت میں اضافہ کروائیں اور جہاز کے رعایت ٹکٹ دلوائیں۔
ایم ڈبلیو ایم کے رہنما علامہ احمد اقبال رضوی نے کہا کہ حکومت نے اگر زمینی راستے پر پابندی لگائی ہے تو متبادل راستے کا انتظام کرے۔
واضح رہے کہ گزشتہ دنوں وزیر داخلہ محسن نقوی نے اعلان کیا تھا کہ رواں سال اربعین کے لیے زائرین براستہ بلوچستان، ایران یا عراق نہیں جا سکتے، براستہ بلوچستان اربعین کے لیے زائرین ایران یا عراق نہیں جاسکتے۔
جس کے بعد مجلس وحدت مسلمین نے زائرین کے لیے اربعین پر زمینی راستوں پر پابندی کے خلاف ملک گیر احتجاج کا اعلان کیا تھا۔
