صدارتی اعزاز نہ ملنے کا شکوہ کرنے والی پاکستانی سینئر اداکارہ فضیلہ قاضی ستارہ امتیاز کے اعلان پر خوشی سے نہال ہوگئیں۔
یومِ آزادی کے موقع پر مختلف شعبہ ہائے زندگی سے تعلق رکھنے والے نمایاں افراد کے لیے صدارتی اعزازات کا اعلان کیا گیا۔ فضیلہ قاضی کا نام بھی ستارہ امتیاز حاصل کرنے والوں کی فہرست میں شامل ہے۔
فوٹوز اینڈ ویڈیوز شیئرنگ پلیٹ فارم انسٹاگرام پر اداکارہ نے 3 دہائیوں کے بعد صدارتی اعزاز ملنے پر اللّٰہ کا شکر ادا کیا۔
انہوں نے اس پُرمسرت موقع پر اظہارِ تشکر کرتے ہوئے لکھا، ’میرے پیارے پاکستان اور میرے تمام مداحوں کا ان کی غیرمتزلزل حمایت کے لیے تہہ دل سے شکریہ۔ یہ میرے لیے اعزاز کی بات ہے کہ مجھے ستارہ امتیاز کےلیے نامزد کیا گیا۔ یہ ایک سول ایوارڈ ہے جو شاندار خدمات کو تسلیم کرتا ہے۔‘
انہوں نے لکھا، ’یہ اعزاز حاصل کرنے کے لیے میں 23 مارچ 2026 کا بے صبری انتظار کر رہی ہوں۔ یہ اعزاز حاصل کرنا میرے ملک اور یہاں کے لوگوں کی محبت اور حوصلہ افزائی کے بغیر ممکن نہیں تھا۔‘
فضیلہ قاضی نے مزید لکھا، ’میں اس موقع کے لیے شکر گزار ہوں اور بہترین کارکردگی کے لیے کوشش جاری رکھنے کا وعدہ کرتی ہوں۔ شکریہ پاکستان۔‘
واضح رہے کہ حکومتِ پاکستان نے مختلف شعبہ ہائے زندگی میں نمایاں کارکردگی دکھانے والی معروف شخصیات کو سول اعزازات دینے کا اعلان کیا ہے۔ ان شخصیات کو 23 مارچ 2026 کو یومِ پاکستان کے موقع پر اعلیٰ ترین قومی اعزازات سے نوازا جائے گا۔