فرمان الہی
نماز کے اوقات
کراچی کے مختلف علاقوں میں بارش کا نیا سلسلہ شروع ہوگیا۔
شارع فیصل، پی ای سی ایچ ایس، گلشن اقبال، صدر، ایئرپورٹ، نرسری اور دیگر علاقوں میں بارش شروع ہو گئی۔
گلزار ہجری اسکیم 33، سہراب گوٹھ سپر ہائی وے اور جناح اسپتال کے اطراف میں بھی بارش شروع ہو گئی۔
حکام نے شہریوں کو غیر ضروری طور پر گھروں سے باہر نکلنے سے گریز کی ہدایت کرتے ہوئے کہا ہے کہ بجلی کے کھمبوں سے دور رہیں۔
شارع فیصل سمیت کئی اہم سڑکوں سے کل کی بارش کا پانی نکالا جا چکا تھا جبکہ ایف ٹی سی، بلوچ کالونی اور ملیر ہالٹ کے مقام پر بارش کا پانی تاحال موجود ہے۔
لیاقت آباد سپر مارکیٹ کے سامنے سڑک سے بھی پانی نہیں نکالا جا سکا ہے۔
دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے کہا ہے کہ آئندہ 24 گھنٹوں کے دوران کراچی، حیدرآباد، ٹھٹھہ اور بدین میں موسلادھار بارش متوقع ہے۔
این ڈی ایم اے نے کہا کہ میرپورخاص، سکھر اور ملحقہ علاقوں میں بھی موسلادھار بارش کا امکان ہے۔ مختصر وقت میں 50 سے 100 ملی میٹر سے زائد بارش ہو سکتی ہے۔
کراچی، حیدرآباد، سکھر اور میرپورخاص میں اربن فلڈنگ کا خطرہ ہے جبکہ ٹھٹھہ، بدین، جامشورو اور دادو میں سیلاب کا خطرہ ہے۔
واضح رہے کہ محکمۂ موسمیات نے کراچی میں گزشتہ روز ہونے والی بارش کے اعداد و شمار جاری کر دیے۔
کراچی کے علاقے گلشن حدید میں پچھلے 24 گھنٹوں میں سب سے زیادہ 178 ملی میٹر بارش ریکارڈ کی گئی۔
محکمۂ موسمیات کے مطابق یونیورسٹی روڈ پر 145 ملی میٹر بارش ریکارڈ کی گئی جبکہ شارع فیصل پر 133، گلشن معمار میں 102، ناظم آباد میں 149 اور پرانا ایئرپورٹ پر 163 ملی میٹر بارش ریکارڈ کی گئی۔
اسی طرح نارتھ کراچی میں 148 ملی میٹر بارش ہوئی جبکہ کورنگی میں 138 ملی میٹر بارش ریکارڈ کی گئی۔
محکمۂ موسمیات کے مطابق اورنگی ٹاؤن میں 81، سعدی ٹاؤن میں 146، ڈی ایچ اے فیز 7 میں 138 اور کیماڑی میں 173 ملی میٹر بارش ریکارڈ کی گئی۔
جناح ٹرمینل پر 156، سرجانی ٹاؤن میں 151، پی اے ایف بیس مسرور کراچی غربی میں 101 اور بحریہ ٹاؤن میں 4.8 ملی میٹر بارش ریکارڈ کی گئی۔
