فرمان الہی
نماز کے اوقات
لاہور پولیس نے علیمہ خان کے بیٹے شاہریز کو گرفتار کرنے کی تصدیق کردی۔
ڈی آئی جی انویسٹی گیشن سید زیشان رضا کا کہنا ہے کہ شاہریز کو 9 مئی کے مقدمات میں گرفتار کیا گیا ہے، آج عدالت میں پیش کیا جائے گا۔
سید زیشان رضا کا کہنا ہے ریاست مخالف سرگرمیوں میں ملوث افراد رعایت کے مستحق نہیں۔
اس سے قبل مسلم لیگ ن کے سینئر رہنما اور وزیراعظم کے مشیر برائے سیاسی امور رانا ثناء اللّٰہ نے جیو نیوز کے پروگرام آج شاہزیب خانزادہ میں گفتگو کرتے ہوئے کہا تھا کہ علیمہ خان کا الزام ثابت ہونے تک صرف الزام ہے۔
انہوں نے بتایا تھا کہ لاہور پولیس چیف نے علیمہ خان کے بیٹے کی گرفتاری کی تردید کی ہے۔
واضح رہے کہ بانی پی ٹی آئی کی بہن علیمہ خان نے کہا تھا کہ چار مسلح نقاب پوش ان کے بیٹے شاہریز کو گھر سے اغوا کر کے لے گئے ہیں۔
انہوں نے کہا کہ سادہ کپڑوں میں ملبوس چار مسلح افراد کچن کے راستے گھر میں داخل ہوئے، ان کا بیٹا اپنی بیوی اور والد کے ساتھ گھر کی بالائی منزل پر تھا، مسلح افراد نے گھر میں ڈرائیور کو بھی ہراساں کیا۔
دوسری جانب رہنما پی ٹی آئی سلمان اکرم راجہ نے کہا کہ علیمہ خان کی لاہور کی رہائشگاہ پر سادہ لباس افراد حملہ آور ہوئے۔
