فرمان الہی
نماز کے اوقات
کراچی میں ایم اے جناح روڈ پر واقع الآمنہ پلازہ میں پٹاخوں کے گودام میں دھماکے سے 5 افراد جاں بحق اور 30 سے زائد افراد زخمی ہو گئے، پولیس نے واقعے کا مقدمہ پریڈی تھانے میں سرکار کی مدعیت میں درج کرلیا۔
پریڈی تھانے میں درج ایف آئی آر میں قتل بالسبب، دھماکہ خیز مواد اور آتش گیر مادہ ذخیرہ کرنے میں غفلت برتنے سمیت دیگر دفعات شامل کی گئی ہیں۔
پولیس کے مطابق گودام کے مالک حنیف اور اس کا بھائی ایوب بھی دھماکے میں زخمی ہوئے۔
حنیف کو ابتدائی طبی امداد جناح اسپتال میں دی گئی، پھر اسے نجی اسپتال منتقل کر دیا گیا، جہاں وہ پولیس کی تحویل میں ہے تاہم حنیف کا بھائی ایوب جناح اسپتال سے غائب ہوگیا،جس کی تلاش جاری ہے۔
دھماکے کے بعد جائے وقوعہ پر شدید اشتعال پایا گیا اور آتشبازی کا سامان لے جانے والی گاڑی کو مشتعل عوام نے روک کر پتھراؤ کیا، گاڑی کے شیشے توڑ دیے اور نقصان پہنچایا، جس پر پولیس نفری نے موقع پر پہنچ کر حالات قابو میں کیے اور گاڑی کو تحویل میں لے لیا۔
جاں بحق افراد کی شناخت 16سالہ اسد،40سالہ نوید،32سالہ کاشف،40سالہ شہزاد علی اور ایک شخص کی شناخت نہیں ہوسکی۔
