فرمان الہی
نماز کے اوقات
پاکستان تحریکِ انصاف (پی ٹی آئی) کے بانی عمران خان کی ہمشیرہ علیمہ خان کے دوسرے بیٹے کو بھی لاہور سے حراست میں لے لیا گیا ہے۔
پولیس نے بانیٔ پی ٹی آئی عمران خان کے دوسرے بھانجے کو بھی 9 مئی کیس میں حراست میں لے لیا۔
ایس ایس پی انویسٹی گیشن کا کہنا ہے کہ علیمہ خان کے بیٹے شیر شاہ کو 9 مئی کے کیسز میں حراست میں لیا گیا ہے، معاملے کی تحقیقات کر رہے ہیں۔
ذرائع کے مطابق علیمہ خان کے دوسرے بیٹے شیر شاہ کو گھر سے کچھ فاصلے سے حراست میں لیا گیا، شیر شاہ کو جب حراست میں لیا گیا تو وہ والد کے ساتھ عدالت سے واپس آ رہے تھے۔
خاندانی ذرائع کے مطابق حراست میں لینے والے وہی تھے جہنوں نے کل علیمہ خان کے بڑے بیٹے شاہریز کو پکڑا تھا، گرفتاری کرنے والوں کے ساتھ پولیس بھی موجود تھی۔
یاد رہے کہ گزشتہ روز لاہور پولیس نے علیمہ خان کے بیٹے شاہریز کو گرفتار کیا تھا۔
ڈی آئی جی انویسٹی گیشن سید ذیشان رضا نے شاہریز کی گرفتاری کی تصدیق کرتے ہوئے کہا تھا کہ شاہریز کو 9 مئی کے مقدمات میں گرفتار کیا گیا ہے، کل عدالت میں پیش کیا جائے گا۔
سید ذیشان رضا کا کہنا تھا ریاست مخالف سرگرمیوں میں ملوث افراد رعایت کے مستحق نہیں۔
اس سلسلے میں بانیٔ پی ٹی آئی کی بہن علیمہ خان نےبتایا تھا کہ چار مسلح نقاب پوش افراد ان کے بیٹے شاہریز کو گھر سے اغواء کر کے لے گئے ہیں۔
انہوں نے کہا کہ سادہ کپڑوں میں ملبوس چار مسلح افراد کچن کے راستے سے گھر میں داخل ہوئے، ان کا بیٹا اپنی بیوی اور والد کے ساتھ گھر کی بالائی منزل پر تھا، مسلح افراد نے گھر میں ڈرائیور کو بھی ہراساں کیا۔
دوسری جانب رہنما پی ٹی آئی سلمان اکرم راجا نے کہا کہ علیمہ خان کی لاہور کی رہائش گاہ پر سادہ لباس افراد حملہ آور ہوئے ہیں۔
