فرمان الہی
نماز کے اوقات
اسلام آباد اور راولپنڈی میں موسلادھار بارش کا سلسلہ جاری ہے، شدید بارش کی پیش گوئی کے تحت مارگلہ ہلز پر ٹریل دو، تین، چار اور پانچ آج بند رہیں گے۔ سید پور گاؤں کے عقب میں واقع ٹریل بھی بند رہے گا۔
اسلام آباد میں موسلا دھار بارش کے باعث ندی نالوں میں طغیانی ہے جبکہ شدید بارش سے اسلام آباد کا علاقہ بہارہ کہو اٹھال چوک پانی میں ڈوب گیا ہے۔
بارش کا پانی گھروں اور دکانوں میں داخل ہوگیا ہے، بارش سے کئی گاڑیاں بھی پھنس گئیں، بارش کے باعث راول ڈیم کے اسپل وے کھول دیے گئے ہیں۔
ڈی آئی خان میں طوفانی ہواؤں کے ساتھ موسلادھار بارش ہوئی جس کے باعث مختلف علاقوں میں درخت اکھڑ گئے اور تاریں ٹوٹ گئیں۔
چھتیں گرنے سمیت مختلف واقعات میں 7 افراد جاں بحق اور 40 زخمی ہوگئے ہیں ، بارش سے نشیبی علاقے زیرآب آگئے جکہ متعدد علاقوں میں بجلی معطل ہے۔
دوسری جانب پشاور، مردان، شمالی ور جنوبی وزیرستان سمیت خیبر پختونخوا کے مختلف علاقوں، آزاد کشمیر میں بھی بارش ہوئی۔
اسکردو میں آج سے تیز بارشوں کی پیش گوئی کی گئی ہے، بارش کی پیش گوئی کے باعث عوام اور سیاحوں کو غیر ضروری سفر نہ کرنے کی ہدایت کی گئی ہے۔
طوفانی بارشوں سے دریائے گلگت کے بہاؤ میں اضافے کا بھی خدشہ ہے جس کے باعث دریا سے ملحقہ تمام ہوٹلز کو بند کردیا گیا۔ دریا کنارے موجود تعلیمی ادارے پیر کو بند رہیں گے۔
این ڈی ایم اے نے 30 اگست تک ملک کے بیش تر علاقوں میں شدید بارشوں کا الرٹ جاری کر رکھا ہے۔
