فرمان الہی
نماز کے اوقات
ٹینس کے عظیم کھلاڑی اور سوئس اسٹار راجر فیڈرر دنیا کے ایسے 7 کھلاڑیوں میں شامل ہوگئے ہیں جنہیں ارب پتی کا درجہ حاصل ہوگیا ہے۔
امریکی جریدے فوربز کی تازہ رپورٹ کے مطابق فیڈرر کی مجموعی دولت کا تخمینہ 1.1 ارب ڈالر ہے۔
فیڈرر نے 2022ء میں ریٹائرمنٹ لی تھی مگر کھیل کے دوران اور اس کے بعد کاروباری معاہدوں سے وہ مسلسل بڑی کمائی کرتے رہے، انہوں نے اپنے کیریئر میں تقریباً ایک ارب ڈالر کورٹ سے باہر معاہدوں اور اسپانسرشپس سے کمائے، جب کہ ان کی کمائی میں سوئس جوتوں اور اسپورٹس وئیر برانڈ میں ان کی شراکت داری نے بھی اہم کردار ادا کیا۔
فیڈرر مسلسل 16 سال تک دنیا کے سب سے زیادہ معاوضہ لینے والے ٹینس پلیئر رہے، حالانکہ ان کے حریف نواک جوکووچ اور رافیل نڈال نے ان سے کہیں زیادہ انعامی رقم جیتی، 2020ء میں فیڈرر نے 106.3 ملین ڈالر کمائے جو دنیا بھر کے تمام ایتھلیٹس میں سب سے زیادہ تھی۔
فیڈرر سے قبل ٹینس میں ارب پتی کھلاڑی کا اعزاز رومانیہ کے ایون تیریاک (Ion Țiriac) کو حاصل تھا، جنہوں نے 1970ء میں فرنچ اوپن ڈبلز ٹائٹل جیتنے کے بعد سرمایہ کاری کی دنیا میں قدم رکھا۔
دنیا کے ارب پتی ایتھلیٹس کی فہرست میں باسکٹ بال لیجنڈز مائیکل جورڈن، میجک جانسن، لیبرون جیمز اور جونیئر برج مین شامل ہیں، جب کہ گولف کے ٹائیگر ووڈز بھی ارب پتی ایتھلیٹس میں شمار ہوتے ہیں۔
فوربز کی رپورٹ کے مطابق رواں برس کے سب سے زیادہ کمانے والے فعال ٹینس پلیئر اسپین کے کارلوس الکاراز رہے جنہوں نے 12 ماہ میں 48.3 ملین ڈالر کمائے۔
خواتین میں امریکی اسٹار کوکو گوف تیسرے نمبر پر رہیں، جنہوں نے گزشتہ سال 37.2 ملین ڈالر کمائے اور اس طرح وہ دنیا کی سب سے زیادہ کمانے والی خاتون ایتھلیٹ بن گئیں۔
فوربز کے مطابق یہ پہلی بار ہے کہ ٹاپ تھری سب سے زیادہ کمانے والے ٹینس کھلاڑی 30 سال سے کم عمر ہیں۔
رپورٹ میں بتایا گیا ہے کہ مجموعی طور پر ٹاپ 10 ٹینس اسٹارز نے 285 ملین ڈالر کمائے، جو گزشتہ سال کے مقابلے میں 16 فیصد زیادہ ہے، تاہم یہ اب بھی 2020ء کے ریکارڈ 343 ملین ڈالر سے کم ہیں۔
