فرمان الہی
نماز کے اوقات
پاکستانی ڈرامہ انڈسٹری کے معروف اداکار عمران عباس نے حال ہی میں اداکار ببرک شاہ کی تنقید کا مؤدبانہ جواب دے دیا۔
ببرک شاہ نے ایک انٹرویو میں عمران عباس کو ہدفِ تنقید بناتے ہوئے کہا تھا کہ عمران عباس فلمی ہیرو کے قابل نہیں اور وہ کسی مرد کی طرح دکھائی بھی نہیں دیتے، ان کے اس بیان پر سوشل میڈیا پر بھی بحث چھڑ گئی تھی۔
تاہم عمران عباس نے بغیر کسی سختی کے نہایت پُرسکون انداز میں جواب دیتے ہوئے کہا کہ مجھے لوگوں کی نفرت یا غیر ضروری تنقید سے کوئی فرق نہیں پڑتا کیونکہ اللّٰہ نے مجھے میری سوچ سے بڑھ کر کامیابیاں دی ہیں، یہ نفرت بھی ایک پیکج کا حصہ ہے، جو لوگ دوسروں سے نفرت کرتے ہیں وہ خود کامیابیوں سے محروم رہ جاتے ہیں۔
انہوں نے مزید کہا کہ جو لوگ سوشل میڈیا پر نفرت انگیز تبصرے کرتے ہیں، ان کی اپنی پروفائل عام سی ہوتی ہے اور ان کی زندگی میں کوئی خاص کامیابی نہیں ہوتی، یہ ان کی محرومیاں ہیں جو انہیں دوسروں پر تنقید کرنے پر مجبور کرتی ہیں۔
عمران عباس نے کہا کہ پیشہ ورانہ طور پر بھی جو لوگ دوسروں پر تنقید کرتے ہیں، وہ وہی ہوتے ہیں جو خود پیچھے رہ جاتے ہیں، ایسے لوگ دوسروں کو نیچا دکھانے کی کوشش کرتے ہیں، اللّٰہ انہیں ہدایت دے، ہم صرف دعا ہی کر سکتے ہیں۔
