فرمان الہی
نماز کے اوقات
وفاقی وزیر اطلاعات عطا تارڑ نے دریاؤں کی گزر گاہوں پر مستقبل میں تعمیرات کے خلاف کارروائی کرنے کا اعلان کردیا۔
وزیر آباد میں میڈیا کو بریفنگ دیتے ہوئے وزیر اطلاعات نے کہا کہ آئندہ دریاؤں کی گزر گاہوں پر تعمیرات کی اجازت نہیں ہوگی، سیلاب سے نقصانات کا تخمینہ لگا کر ازالہ کیا جائے گا۔
عطاتارڑ نے کہا کہ غیر قانونی تعمیرات کے گرنے پر معاوضہ نہیں مل سکتا، پہلی بار بارش کے تین چار سسٹم ساتھ ساتھ آئے ہیں، پاک فوج اور انتظامیہ نے بروقت رسپانس دے کر کئی افراد کو بچایا۔
وزیر اطلاعات نے کہا کہ 3 دریاؤں کی طغیانی میں 2 لاکھ سے زائد افراد کو ریسکیو کیا گیا، لوگوں کی حفاظت کیلئے متاثرہ علاقوں میں بجلی بند کی گئی، لوگوں کے مویشیوں کے نقصان کا بھی تخمینہ لگایا جا رہا ہے۔
انہوں نے کہا کہ آج رات تک سیلاب سے متاثرہ سڑکوں کا سروے مکمل کر لیا جائے گا، لوگوں کے مال مویشی کا بہت نقصان ہوا ہے، ازالہ کیا جائے گا، پنجاب حکومت کسی بھی ہنگامی صورتحال سے نمٹنے کیلئے تیار تھی، ٹیم ورک کے باعث شہر محفوظ رہا۔
عطا تارڑ نے مزید کہا کہ جب پاکستان پر آفت آتی ہے سب ایک ہو جاتے ہیں، خیبر پختوا میں وفاقی حکومت نے بھر پور تعاون کیا ہے، لوگوں کی مشکلات کا ادراک ہے، جلد حل کریں گے، سڑکوں کی بحالی کے لیے کام جاری ہے۔
وفاقی وزیر عطا تارڑ نے کہا کہ بجلی سے متعلقہ مسائل کے حل کے لیے اقدامات کیے جا رہے ہیں، حکومت کی طرف سے بھی معاوضہ دیا جائے گا، وزیر آباد سوہدرہ روڈ پر پانی آہستہ آہستہ واپس جا رہا ہے، آبی گزر گاہوں میں اب تعمیرات کی اجازت نہیں ہوگی، سیلاب میں جاں بحق افراد کے لیے حکومت 20 لاکھ روپے معاوضہ دے گی۔
خیال رہے کہ پنجاب کے دریاؤں راوی، چناب اور ستلج میں بڑے سیلابی ریلے آئے، راوی میں شاہدرہ پر انتہائی اونچے درجے کا سیلاب آیا، جسڑ میں پانی کا دباؤ کم ہونے لگا۔
قصور، سیالکوٹ، نارووال، عارف والا، حافظ آباد، کمالیہ، پھول نگر، کوٹ مومن، منڈی بہاؤالدین، تاندلیانوالہ، بہاولنگر، وہاڑی اور پاکپتن میں دریا کنارے دیہات زیر آب آگئے، شہریوں نے بڑے پیمانے پر نقل مکانی کی۔
ریسکیو حکام، مقامی رضاکاروں، پاک فوج اور پاکستان رینجرز کی امدادی کارروائیاں جاری ہیں۔
وزیراعظم شہباز شریف اور وزیراعلیٰ پنجاب مریم نواز نے سیلاب سے متاثرہ علاقوں کا دورہ کرتے ہوئے فضائی معائنہ بھی کیا۔
پی ڈی ایم اے کے مطابق اس وقت 10 لاکھ کیوسک کا ریلا چناب اور 2 لا کھ کیوسک کا ریلا دریائے راوی سے گزر رہا ہے۔
