فرمان الہی
نماز کے اوقات
وفاقی وزیر اطلاعات عطا تارڑ نے کہا ہے کہ وزیراعظم شہباز شریف نے چاروں وزرائے اعلیٰ کی حمایت سے نئے ڈیم بنانے کی حکمت عملی بنالی ہے۔
جیو نیوز کے پروگرام کیپیٹل ٹاک میں گفتگو کرتے ہوئے عطا تارڑ کا کہنا تھا کہ نئے ڈیموں پر کئی بار بات ہوئی، وزیراعظم نے دیامر بھاشا ڈیم جلد مکمل کرنے کا کہا۔
انہوں نے کہا کہ ایک اجلاس میں ڈیم کے لیے وزیراعلیٰ علی امین گنڈاپور نے بھی فنڈ دینے کا کہا، ڈیموں سے متعلق صوبوں کی طرف سے بھرپور تعاون کی یقین دہانی ہے۔
وزیر اطلاعات نے کہا کہ وزیر اعلیٰ نے واضح کیا کہ سیلاب سے نقصانات کا تخمینہ بغیر سیاسی تفریق کے لگایا جائے گا، سیلاب سے نقصانات کے ازالے میں کوئی سیاسی تفریق نہیں کی جائے گی، سیلاب سے نقصانات کا تخیمنہ پانی کم ہوتے ہی لگانا شروع کر دیا جائے گا، ضرورت ہے کہ درخت لگائے جائیں اور درخت کاٹنے پر احتساب ہو۔
عطا تارڑ نے کہا کہ اسپیکر اور چیئرمین سینیٹ بہتر طریقے سے معاملات کو چلاتے ہیں، پی ٹی آئی کو قائمہ کمیٹیوں سے نہیں نکلنا چاہیے۔
ہمارے ارکان کے گھروں پر چھاپے مارے جا رہے ہیں، سلمان اکرم راجہ
پروگرام میں شریک پی ٹی آئی رہنما سلمان اکرم راجا نے گفتگو کرتے ہوئے کہا کہ ہمارے ارکان کے گھروں پر چھاپے مارے جا رہے ہیں گرفتاریاں کی جا رہی ہیں، اس لیے قائمہ کمیٹیوں سے نکلے کہ مزید اس ڈھکوسلے اور مذاق کا حصہ نہیں بنیں گے۔
سلمان اکرم راجا نے کہا کہ یہ جھوٹ پر کھڑا نظام ہے کیا یہ ضمنی الیکشن بغیر فارم 47 کے ہونے دیں گے؟ حقیقت یہ ہے کہ ملک میں صرف ایک ہی قانون ہے اور وہ جبر کا قانون ہے، بانی پی ٹی آئی سے ملاقات قانونی حق ہے متعدد کیسز میں ان کا وکیل ہوں، تین چار ماہ سے بانی پی ٹی آئی کے خاندان کو ملاقات کی اجازت نہیں دی گئی۔
انہوں نے کہا کہ آج پی ٹی آئی پہلے سے زیادہ منظم اور مضبوط ہے، کچھ معاملات پر بانی پی ٹی آئی کی رائے چاہیے تھی وہ چیزیں کل ہوئی ہیں، آج بانی پی ٹی آئی سے ملاقات ہونا تھی پھر خبر آئی کہ سماعت ملتوی کر دی گئی۔
سلمان اکرم راجا نے کہا کہ جب تک آزادی حاصل ہے بولتا رہوں گا اور کھڑا رہوں گا، مجھے کسی عقوبت خانے میں ڈالتے ہیں تو پھر دیکھیں گے کہ کیا صورتحال بنتی ہے۔
پی ٹی آئی رہنما نے کہا کہ خیبر پختونخوا میں جو قدرتی آفت آئی ہے مل کر اس کا مقابلہ کرنا ہے، پورے ملک میں سیلاب کا سامنا ہے اس کا مل کر مقابلہ کرنا ہے۔
سلمان اکرم راجا نے یہ بھی کہا کہ بانی پی ٹی آئی نے کہا کہ سب سے برتر طاقت روحانی اور اخلاقی ہے، بانی پی ٹی آئی نے کہا کہ سب سے کم تر طاقت جسمانی ہے۔
