فرمان الہی
نماز کے اوقات
بنوں میں سیکیورٹی فورسز نے فیڈرل کانسٹیبلری (ایف سی) ہیڈکوارٹرز پر حملہ ناکام بناتے ہوئے فتنہ الخوارج کے 5 دہشت گردوں کو ہلاک کردیا۔
پاک فوج کے شعبۂ تعلقاتِ عامہ آئی ایس پی آر کے مطابق بھارتی اسپانسرڈ خوارج کی جانب سے سیکیورٹی حدود کو توڑنے کی کوشش کی گئی۔
آئی ایس پی آر کا کہنا ہے کہ حملے کو ناکام بناتے ہوئے بھارتی پراکسی ’فتنہ الخوارج‘ کے تمام 5 دہشت گردوں کو ہلاک کر دیا گیا۔
پاک فوج کے شعبۂ تعلقاتِ عامہ نے بتایا ہے کہ شدید جھڑپ میں فیڈرل کانسٹیبلری اور پاک فوج کے 6 جوان شہید ہوئے ہیں۔
آئی ایس پی آر کے مطابق سیکیورٹی فورسز کے بر وقت، چوکس اور جرأت مندانہ ردِعمل کے باعث خوارج کے عزائم ناکام بنا دیے گئے۔
پاک فوج کے شعبۂ تعلقاتِ عامہ کے مطابق بھارتی اسپانسرڈ خوارج نے بارودی مواد سے بھری گاڑی دیوارِ حصار سے ٹکرائی، خودکش دھماکے کے نتیجے میں حصار کی دیوار کا کچھ حصہ گر گیا۔
آئی ایس پی آر کا کہنا ہے کہ دھماکے سے قریبی سول انفرااسٹرکچر کو نقصان پہنچا جس سے 3 شہری زخمی ہوئے، جوانوں نے بہادری اور پیشہ ورانہ مہارت کا مظاہرہ کرتے ہوئے خوارج کو نشانہ بنایا، علاقے میں کلیئرنس آپریشن جاری رہے گا۔
پاک فوج کے شعبۂ تعلقاتِ عامہ کا کہنا ہے کہ اس بھیانک اور بزدلانہ عمل کے مجرموں کو انجام تک پہنچایا جائے گا، سیکیورٹی فورسز پوری قوم کے شانہ بشانہ بھارتی اسپانسرڈ دہشت گردی کے مکمل خاتمے کے لیے پُرعزم ہیں، ہمارے بہادر سپاہیوں اور شہریوں کی یہ لازوال قربانیاں ملک کے دفاع کے عزم کو مزید مضبوط کرتی ہیں۔
