فرمان الہی
نماز کے اوقات
پاکستان تحریک انصاف (پی ٹی آئی) کے رہنما سلمان اکرم راجہ نے کہا ہے کہ لاہور میں ایم پی ایز، ایم این ایز کو بانی کا پیغام پہنچایا ہے۔
راولپنڈی میں انسداد دہشت گردی عدالت کے باہر میڈیا سے گفتگو کرتے ہوئے سلمان اکرم راجا نے کہا کہ تمام پارٹی رہنماؤں کو بتایا گیا ہے کہ سیلاب زدگان کی جیب سے مدد کریں، کالا باغ ڈیم پر وزیراعلیٰ خیبر پختونخوا کا بیان پارٹی پالیسی نہیں، جو بھی بات ہوئی ہے وہ ذاتی رائے ہوسکتی ہے پارٹی پالیسی نہیں، کالاباغ ڈیم پر سندھ اور کے پی میں بھی کچھ لوگوں کے تحفظات ہیں۔
انہوں نے کہا کہ سیاسی ہم آہنگی اور اطمینان نہ ہو تب تک کوئی منصوبہ نہیں لگنا چاہیے، 2 صوبوں کے درمیان تنازع سے وفاق کو بھی نقصان ہوگا۔
سلمان اکرم راجا نے کہا کہ صدارتی نظام بھی پی ٹی آئی کی پارٹی پالیسی نہیں، موجودہ پارلیمنٹ فارم 47 کی پارلیمنٹ ہے، پارلیمنٹ کا استحقاق نہیں آئینی ترمیم کر کے صدارتی نظام رائج کرے۔
سلمان اکرم راجا نے کہا کہ میرے خلاف درج مقدمات میں کچھ نہیں یہ سارے جھوٹے مقدمے ہیں۔ ہر دفعہ تاریخ پڑ جاتی ہے لیکن انہی جھوٹے مقدمات میں یہ سزا بھی دیں گے، عدالتوں سے امید تو نہیں لیکن کبھی کبھار ریلیف دینا عدالت کی مجبوری بن جاتی ہے، جہاں کوئی شہادت گواہی نہ ہو پھر بھی سزائیں دی جائیں تو کیا امید رکھیں۔
انہوں نے کہا کہ ہمیں اس قسم کا ریلیف ملتا ہے جہاں عدالت بےبس ہو جاتی ہے۔
