فرمان الہی
نماز کے اوقات
وفاقی وزیرِ ریلوے حنیف عباسی 3 روزہ سرکاری دورے پر کراچی پہنچ گئے، جس کے بعد انہوں نے کراچی کینٹ اسٹیشن کا دورہ کیا۔
اس موقع پر حنیف عباسی نے اسٹیشن کینٹین پر فروخت ہونے والی اشیاء کی زائد قیمتوں پر برہمی کا اظہار کیا اور کہا کہ اسٹیشن اور مارکیٹ کی قیمتیں ایک جیسی ہونی چاہئیں۔
وفاقی وزیرِ ریلوے نے کہا کہ اسٹیشن پر زیادہ قیمتوں پر اشیاء کی فروخت برادشت نہیں کی جائے گی۔
ترجمان کے مطابق وفاقی وزیرِ ریلوے حنیف عباسی نے ڈی ایس ریلوے کراچی کو کینٹ اسٹیشن پر صفائی کی ہدایت کی۔
اسٹیشن پر موجود مسافروں نے وزیرِ ریلوے کو صورتِ حال کی شکایات کیں۔
ترجمان کے مطابق وفاقی وزیر حنیف عباسی نے مسافروں کی شکایات کا نوٹس لیا۔
ترجمان نے بتایا ہے کہ وفاقی وزیرِ ریلوے حنیف عباسی کا کہنا ہے کہ لاہور کی طرح کراچی کینٹ اسٹیشن کو بھی اپ گریڈ کریں گے، کراچی سمیت حیدر آباد، سکھر اور روہڑی ریلوے اسٹیشنز پر کام ہو گا۔
حنیف عباسی نے کہا خواجہ آصف سے کوئی لڑائی نہیں، میں حکومت کا ترجمان نہیں میرا اپنا موقف ہے۔ پاکستان نے بہت بڑے دشمن کو شکست دی اس کو انجوائے کریں
وفاقی وزیر ریلوے نے کہا زندگی میں آج تک کسی کے کہنے پر کوئی تقریر نہیں کی، خواجہ آصف کو نشان امتیاز دیں یا نشان جرات مجھے کوئی اعتراض نہیں، حکومت دودھ کی نہریں بھی بہا رہی ہو تو اپوزیشن کو اعتراض ہی کرنا ہے کہ پانی ملا دودھ ہے۔
حنیف عباسی نے کہا خواجہ آصف میرے بزرگ اور رانا ثنا اللہ بڑے بھائیوں جیسے ہیں، حکومتی بینچ پر کوئی حکومت کے خلاف گلے شکوے کرے گا یہی جواب دوں گا، بول چال تو کبھی کبھار دو بھائیوں میں بھی بند ہوجاتی ہے۔
انھوں نے کہا میری کل کی تقریر کا بول چال بند ہونے سے کوئی تعلق نہیں، ایسی گفتگو سے پنجاب حکومت اور وفاقی حکومت ڈس کریڈٹ ہوتی ہے، کیا سیلاب میں پنجاب میں کیے گئے اقدامات خیبر پختونخوا سے بہتر نہیں؟ مجھے خواجہ آصف کا مقابلہ نہیں کرنا حق اور سچ کہنا ہے۔
