فرمان الہی
نماز کے اوقات
کراچی کے علاقے جام گوٹھ ملیر کے مقام پر شاہراہ بھٹو سیلاب میں بہہ گئی۔
پانی ملیر ندی کے درمیان تعمیر ہونے والی شاہراہ بھٹو کو کاٹ کر دوسری جانب نکل گیا۔
علاقہ مکین کا کہنا ہے کہ ملیر ندی کے اندر شاہراہ بھٹو کی تعمیر کی وجہ سے پانی گزرنے کی جگہ تنگ ہو گئی ہے۔
کراچی میں بارش برسنے اور تھڈو ڈیم بھرنے کے بعد کراچی کی ملیر اور لیاری ندیاں بپھر گئیں، پانی اطراف کی آبادیوں میں داخل ہوگیا، متعدد افراد کے پھنسے ہونے کی اطلاعات پر ریسکیو آپریشن جاری ہے۔
تھڈو ڈیم کا سیلابی پانی اسکیم 33 کے رہائشی علاقوں میں داخل ہوگیا۔
لیاری ندی میں بھی طغیانی کے باعث ایف بی ایریا، شفیق کالونی، حسن نعمان کالونی، سہراب گوٹھ، لیاری بکرا پیڑی کے قریب بھی ندی کا پانی گھروں میں داخل ہو گیا، کئی فٹ پانی جمع ہونے سے لوگ گھروں میں محصور ہوگئے۔
کشتیوں سے ریسکو آپریشن جاری ہے، گلشن اقبال کےقریب لیاری ندی میں پھنسے 2 افراد کو بحفاظت نکال لیا گیا۔
ترجمان وزیراعلیٰ سندھ کے مطابق تھڈو ڈیم میں پانی کی سطح بلند ہونے سے پانی ایم نائن سے ٹکرا گیا، جمالی پل کے قریب ایم نائن پانی سے بھر گیا۔
انہوں نے کہا کہ سندھ حکومت نے ایم نائن کی بیچ کی دیوار توڑ کر پانی کو راستہ دینے کا فیصلہ کیا ہے۔
کورنگی کازوے پر پانی کا تیز بہاؤ ہونے کی وجہ سے گودام چورنگی تا محمود آباد روڈ بند کر دیا گیا ہے۔
ٹریفک پولیس کے مطابق ٹریفک کو گودام چورنگی سے جام صادق برج کی طرف بھیجا جا رہا ہے،ٹریفک کو محمود آباد سے ایکسپریس وے قیوم آباد کی طرف بھیج رہے ہیں۔
اس کے علاوہ قیوم آباد سے کورنگی کراسنگ جانے والی سڑک بھی بند ہے۔ ٹریفک کو قیوم آباد سے گودام چورنگی کی طرف بھیجا جا رہا ہے۔
