فرمان الہی
نماز کے اوقات
بانی پاکستان تحریک انصاف (پی ٹی آئی) عمران خان کی ہدایت کے بعد پارٹی کے بیشتر سینیٹرز نے قائمہ کمیٹیوں سے استعفے دے دیے۔
پی ٹی آئی کے سینیٹر ہمایوں مہمند نے بھی قائمہ کمیٹیوں سے استعفیٰ دے دیا، انہوں نے استعفیٰ چیئرمین سینیٹ کو ارسال کر دیا، ہمایوں مہمند نے بطور چیئرمین پارلیمانی کمیٹی استعفیٰ دیا۔
ہمایوں مہمند نے بطور ممبر آئی ٹی، آبی وسائل اور انسانی حقوق کمیٹیوں سے بھی استعفیٰ دے دیا۔
پی ٹی آئی سینیٹر فلک ناز چترالی نے سینیٹ کی متعلقہ قائمہ کمیٹیوں سے استعفیٰ دے دیا، فلک ناز چترالی نے استعفیٰ چیئرمین سینیٹ کو بھجوایا، انہوں نے بطور ممبر موسمیاتی تبدیلی، اکنامک افیئرز، تعلیم و تربیت کی کمیٹیوں سے بھی استعفیٰ دیا۔
پی ٹی آئی کی سینیٹر فوزیہ ارشد بھی قائمہ کمیٹیوں سے مستعفی ہوگئی ہیں۔ ان کا کہنا ہے کہ استعفیٰ پارلیمانی لیڈر علی ظفر کو بھجوا دیا ہے۔
اس سے قبل سینیٹر اعظم خان سواتی، سینیٹر علی ظفر، سینیٹر دوست محمد اور سینیٹر ذیشان خانزادہ نے قائمہ کمیٹیوں سے استعفیٰ دیا تھا۔
اعظم سواتی نے پارٹی کی ہدایت پر سینیٹ کی 5 قائمہ کمیٹیوں سے استعفیٰ دیا۔ ان کا کہنا تھا کہ قائمہ کمیٹیوں سے استعفے دے کر موجودہ پارلیمانی نظام کے خلاف احتجاج کر رہے ہیں، استعفے اپنے پارلیمانی لیڈر علی ظفر کو بھیج دیے جو چیئرمین سینیٹ کو بھیجیں گے۔
سینیٹر علی ظفر اطلاعات نشریات کمیٹی کی چیئرمین شپ سے مستعفی ہو گئے۔
قائمہ کمیٹی سمندر پار پاکستانیوں کے چیئرمین ذیشان خانزادہ نے استعفیٰ دے دیا۔ وہ خارجہ امور، خزانہ، کامرس اور نجکاری کی کمیٹیوں کی رکنیت سے بھی مستعفی ہوئے ہیں۔
