فرمان الہی
نماز کے اوقات
فیلڈ مارشل سید عاصم منیر نے سیلاب سے متعلق کہا ہے کہ ریاست ہر سال قیمتی جانوں اور املاک کے نقصان کی متحمل نہیں ہوسکتی۔
پاک فوج کے شعبۂ تعلقاتِ عامہ (آئی ایس پی آر) کے مطابق آرمی چیف نے قصور سیکٹر اور جلالپور پیر والا ملتان میں قائم فلڈ ریلیف کیمپ کا دورہ کیا، سیلاب متاثرہ علاقوں میں آمد پر فیلڈ مارشل سید عاصم منیر کا لاہور اور ملتان کور کے کور کمانڈرز نے استقبال کیا، آرمی چیف نے لاہور-قصور اور ملتان-جلالپور پیر والا کے سیلاب سے متاثرہ علاقوں کا فضائی جائزہ بھی لیا۔
اس موقع پر آرمی چیف کو زمینی صورتحال، متاثرہ علاقوں میں جاری ریسکیو اور امدادی کارروائیوں کے بارے میں بریفنگ دی گئی۔
آرمی چیف نے سول انتظامیہ سے گفتگو کرتے ہوئے اچھی طرزِ حکمرانی اور عوام دوست ترقی کی اہمیت پر زور دیا اور سیلاب متاثرین کے مسائل حل کرنے میں سول اور فوجی اداروں کے ہم آہنگ تعاون کی اہمیت کو اُجاگر کیا۔
فیلڈ مارشل سید عاصم منیر نے کہا کہ عوام کو بار بار آنے والے سیلاب کی تباہ کاریوں سے بچانے کیلئے درکار تمام ضروری اقدامات اور انفرا اسٹرکچر کی ترقی کو تیز کیا جانا چاہیے۔
آرمی چیف نے ریلیف آپریشنز میں مصروف فوجی جوانوں، ریسکیو 1122 کے اہلکاروں اور پولیس افسروں سے بھی ملاقات کی اور ان کے بلند حوصلے، تیاری اور انتہائی مشکل حالات میں قوم کی خدمت کے جذبے کو سراہا۔
آرمی چیف نے محفوظ مقامات پر منتقل کیے گئے سیلاب متاثرین سے بھی ملاقات کی اور متاثرین کو دوبارہ آباد کاری اور بحالی میں مکمل تعاون کی یقین دہانی کروائی۔
آئی ایس پی آر کے مطابق متاثرین نے بروقت مدد فراہم کرنے پر پاک فوج کا شکریہ ادا کیا۔
