• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ضمنی بلدیاتی انتخابات: 11 اضلاع میں چیئرمین، وائس چیئرمین کی 9 میں سے 5 نشستوں پر پیپلز پارٹی کے امیدوار کامیاب

—فائل فوٹو
—فائل فوٹو

کراچی و حیدرآباد سمیت سندھ میں ضمنی بلدیاتی انتخابات میں پیپلز پارٹی نے واضح اکثریت سے کامیابی حاصل کر لی۔

11 اضلاع میں چیئرمین، وائس چیئرمین کی 9 میں سے 5 نشستوں پر پیپلز پارٹی کے امیدوار کامیاب ہو گئے، ایک نشست آزاد امیدوار کے حصے میں آئی، جنرل کونسلر کی نشست پر جی ڈی اے کے حصے میں 1 اور تحریک لبیک کے حصے میں 2 نشستیں آئیں جبکہ آزاد امیداروں نے بھی 2 نشستیں جیتیں، جے یو آئی کا کوئی بھی امیدوار کامیاب نہ ہو سکا۔

غیر حتمی و غیر سرکاری نتائج کے مطابق  کراچی میں ٹی ایم سی منگھوپیر کی یو سی 10 میں وائس چیئرمین کی نشست پر پیپلز پارٹی کے اسٹفن مسیح 891 ووٹ لے کر وائس چیئرمین منتخب ہو گئے، اے این پی کے احسن اللّٰہ 324 ووٹ لے کر دوسرے نمبر پر رہے۔

 یو سی 8، ٹی ایم سی بلدیہ کیماڑی  میں وائس چیئرمین کا انتخاب ہوا، جس میں غیر حتمی غیر سرکاری نتیجے کے مطابق پیپلز پارٹی کے محمد فیصل 3132 ووٹ لے کر کامیاب ہوئے، جبکہ آزاد امیدوار حسنین چوہان 1084 لے کر دوسرے نمبر پر رہے۔

 ٹی ایم سی سہراب گوٹھ، یو سی 8 وائس چیئرمین کی نشست پر  پیپلز پارٹی کے شہروز احمد غیر حتمی غیر سرکاری نتیجے کے مطابق  1790 ووٹ لے کر کامیاب ہوئے، جماعتِ اسلامی کے امیدوار آصف علی 73 ووٹ حاصل کر کے دوسرے نمبر پر رہے۔

ضلع غربی ٹی ایم سی اورنگی یوسی 7  میں جنرل وارڈ ممبر کی نشست پر   غیر حتمی غیر سرکاری نتیجے کے مطابق جماعتِ اسلامی کے محمد بلال نصیر 791 ووٹ لے کر کامیاب ہوئے، جبکہ پیپلز پارٹی کے شیخ اظہر 749 ووٹ حاصل کر کے دوسرے نمبر پر رہے۔

کراچی میں ضلع غربی یوسی ون پولنگ اسٹیشن 9 کے غیر حتمی غیر سرکاری نتائج کے مطابق پیپلز پارٹی کی شہنیلا عامر 53 ووٹ لے کر آگے، ٹی ایل پی امیدوار محمد علی 51 ووٹ کے ساتھ دوسرے نمبر پر ہیں، جبکہ پی ٹی آئی کے حمایت یافتہ امیدوار عامر حیات کو 21 ووٹ ملے ہیں۔

 تحریکِ لبیک نے اورنگی ٹاؤن یوسی ون میں چیئرمین کی نشست جیتنے کا دعویٰ کرتے ہوئے کہا ہے کہ فارم 11 اور 12 کے مطابق تحریک لبیک کا امیدوار کامیاب ہوا ہے۔

واضح رہے کہ سندھ کے 14 اضلاع میں ضمنی بلدیاتی انتخابات آج ہوئے، جن میں شہرِ قائد کے مختلف علاقوں میں 28 بلدیاتی نشستوں پر پولنگ ہوئی، پولنگ کا وقت ختم ہونے کے بعد تمام پولنگ اسٹیشنز کے دروازے بند کر دیے گئے تھے۔

سکھر، خیرپور، گھوٹکی، حیدر آباد، مٹیاری، جامشورو، دادو، بدین، ٹھٹہ، میرپور خاص میں بھی ضمنی بلدیاتی الیکشن کے لیے پولنگ ہوئی۔

پولنگ کا عمل صبح 8 بجے سے شام 4 بجے تک جاری رہا۔

قومی خبریں سے مزید