فرمان الہی
نماز کے اوقات
اسلامی نظریاتی کونسل (سی آئی آئی) نے ودہولڈنگ ٹیکس کے مسئلے پر وضاحتی بیان جاری کردیا ہے، جس میں کہا گیا کہ آج کے اجلاس میں تاثر سامنے آیا کہ ودہولڈنگ ٹیکس پرحتمی رائے قائم کرلی ہے۔
بیان میں مزید کہا گیا کہ حقیقتا چند ارکان نے اس پر ابتدائی بحث کی، جس میں آرا مختلف تھیں، اراکین نے اس پر اگلے اجلاس میں ماہرین سے مشاورت کرنے کا کہا ہے۔
وضاحتی بیان میں یہ بھی کہا گیا کہ فیصلہ ہوا تھا کونسل کے آئندہ اجلاس میں بحث اور ماہرین سے رائے لی جائے، ودہولڈنگ ٹیکس کے زیر بحث مسئلے پر کونسل کا کوئی فیصلہ نہیں ہوا۔
اس سے قبل چیئرمین اسلامی نظریاتی کونسل علامہ راغب نعیمی نے ’جیو نیوز‘ سے گفتگو میں کہا کہ ودہولڈنگ ٹیکس کے معاملے پر اگلے اجلاس میں دوبارہ غور کریں گے۔
انہوں نے کہا کہ ودہولڈنگ ٹیکس کا معاملہ اجلاس کا آخری ایجنڈا آئیٹم تھا، اجلاس کے دوران کھانا لگ گیا تو متعدد ارکان چلے گئے جبکہ متعدد ارکان ودہولڈنگ ٹیکس کے خلاف تھے۔
علامہ راغب نعیمی نے کہا کہ نوٹ لینے والے عملے نے سمجھا کہ ودہولڈنگ ٹیکس کو غیر شرعی قرار دیا گیا ہے۔
اس سے قبل اسلامی نظریاتی کونسل کی پریس ریلیز میں ود ہولڈنگ ٹیکس کو غیر شرعی قرار دیا گیا تھا۔
سپریم کورٹ کے فیصلے پر اظہارِ تحفظ
آج چیئرمین سی آئی آئی علامہ ڈاکٹر راغب نعیمی کی زیر صدارت اسلامی نظریاتی کونسل کا اجلاس ہوا تھا، جس میں سپریم کورٹ کے رواں برس 11 ستمبر کے فیصلے پر تحفظات کا اظہار بھی کیا گیا۔
کونسل کے اعلامیے میں کہا گیا کہ رخصتی سے قبل طلاق کی صورت میں عدت اور نفقہ لازمی قرار دینا قرآن و سنت کے خلاف ہے، سپریم کورٹ نے نکاح کے بعد رخصتی سے قبل طلاق کے مقدمے میں نان نفقہ کی ادائیگی کا حکم دیا تھا۔
انسانی دودھ ذخیرہ کرنے کے ادارے خاص شرائط کے تحت قائم کرنے کی اجازت
کونسل نے رائے دی کہ انسانی دودھ ذخیرہ کرنے کے مخصوص ادارے خاص شرائط کے تحت قائم کیے جا سکتے ہیں۔
اسلامی نظریاتی کونسل نے کہا ہے کہ مفاسد سے بچنے کے لیے پہلے لازمی قانون سازی کی جائے، انسانی دودھ سے متعلق قانون سازی میں کونسل کو شامل کیا جائے۔
دیت کے قانون میں ترمیم کی شقوں کی مخالفت
کونسل نے دیت کے قانون میں ترمیم کی شقوں کی مخالفت کی اور کہا ہے کہ دیت کے قانون میں ترمیم کے لیے پیش کردہ بل سےاتفاق نہیں کرتے۔
اسلامی نظریاتی کونسل نے کہا ہے کہ دیت کی سونا، چاندی اور اونٹ سے متعلق شرعی مقداریں قانون میں شامل رہنی چاہئیں، بل میں چاندی کو حذف اور سونے کی غیر شرعی مقدار کو معیار بنایا گیا ہے۔
خنزیر کے اجزاء پر مشتمل انسولین سے پرہیز کیا جائے
کونسل نے کہا ہے کہ شوگر کے مریضوں کے لیے حلال اجزاء والی انسولین دستیاب ہے، خنزیر کے اجزاء پر مشتمل انسولین سے پرہیز کیا جائے، اس مقصد کے لیے مناسب قانون سازی بھی کی جائے۔
