فرمان الہی
نماز کے اوقات
ایشیا کپ 2025 کے گزشتہ روز ہونے والے فائنل میں 41 برس بعد پاکستان اور بھارت کی ٹیمیں آمنے سامنے آئیں تاہم قومی کرکٹ ٹیم اس امتحان میں فیل ہوگئی۔
ایشیا کپ کے سب سے بڑے مقابلے میں قومی ٹیم کے فاسٹ بولر حارث رؤف سب سے مہنگے بولر ثابت ہوئے۔
انہوں نے بغیر کسی وکٹ 3.4 اوورز میں 13.63 کی اوسط سے 50 رنز دیے جبکہ 2 اوورز میں 30 رنز دے کر جیتا ہوا میچ بھارتی ٹیم کو پلیٹ میں سجا کر دے دیا۔ بدترین بولنگ کے باوجود آخری اوور حارث رؤف سے کروانے کے فیصلے پر کپتان سلمان علی آغا پر بھی انگلیاں اُٹھ گئیں۔
حارث رؤف سمیت پاکستانی کرکٹ ٹیم کی کارکردگی پر جہاں سوشل میڈیا صارفین سوال اُٹھا رہے ہیں وہیں شوبز انڈسٹری سے تعلق رکھنے والی معروف شخصیات بھی انہیں تنقید کا نشانہ بنا رہی ہیں۔
اداکارہ و میزبان مشی خان نے قومی ٹیم کو آڑے ہاتھوں لیتے ہوئے انہیں سفارشی قرار دے دیا اور کہا کہ آپ لوگ کھیلنے یا مقابلہ کرنے نہیں جاتے، کیونکہ انہیں پتہ ہے کہ ہم کھیلیں یا نہ کھیلیں ہمیں ٹیم میں ہونا ہے۔ آپ کی باڈی لینگویچ ہی نہیں ہے میچ کھیلنے اور جیتنے والی، آپ لوگ ان ٹورنامنٹ میں پارٹیاں کرنے جاتے ہیں۔
انہوں نے حارث رؤف کو مخاطب کرتے ہوئے سوال کیا کہ کیا آپ سلاد کے لیے مرچیاں کاٹ کے آئے تھے؟ آپ کے ہاتھوں میں کوئی مسئلہ تھا جو گیند بار بار سلیپ ہو رہی تھی؟
اداکارہ نے کہا کہ آپ لوگوں نے فائنل میں پوری دنیا کے سامنے بےعزت کردیا لگ رہا تھا گلی محلے کی کرکٹ کھیل رہے ہیں۔
اداکار عثمان خالد بٹ نے ایکس پر پوسٹ شیئر کرتے ہوئے کہا کہ مبارک ہو پاکستان جیتا ہوا میچ ہار گیا۔
عالمی شہرت یافتہ گلوکار علی ظفر نے بھی سوشل میڈیا پر خیالات کا اظہار کرتے ہوئے کہا کہ کہ میری سمجھ سے باہر ہے کہ حارث رؤف کو آخری اوور کیوں دیا؟
اداکارہ آمنہ نے اس حوالے سے دلچسپ تبصرہ کرتے ہوئے دعا کی کہ یا اللّٰہ پاکستانی ٹیم کی جیت کے لیے جتنی عبادت کی، اس کا ثواب نانا نانی، دادا دادی کو دینا۔ اس کے ساتھ ہی انہوں نے حارث رؤف کی ٹیم میں موجودگی پر بھی سوال اُٹھائے۔
دوسری جانب اداکار فہد مصطفیٰ نے کہا کہ بھارتی ہٹ دھرمی کا جواب صرف قومی ٹیم کی جیت تھی، باقی تمام چیزیں بےمعنی ہیں۔
اس کے علاوہ اداکار عاصم محمد، جبران ناصر سمیت دیگر نے بھی پاکستانی ٹیم کی خراب پرفارمنس پر انہیں کڑی تنقید کا نشانہ بنایا۔
