فرمان الہی
نماز کے اوقات
سعودی پاکستان مشترکہ بزنس کونسل کے چیئرمین پرنس منصور بن محمد آل سعود کی قیادت میں آنے والے سعودی وفد نے وزیرِ اعلیٰ پنجاب مریم نواز شریف سے ملاقات کی۔
پاک سعودی جوائنٹ بزنس کونسل کے وفد کے اعزاز میں منعقدہ تقریب کے دوران وزیرِ اعلی پنجاب مریم نواز نے اظہارِ خیال کرتے ہوئے کہا کہ برادر اسلامی ملک سعودی عرب کے معزز وفد کو خوش آمدید کہتی ہوں، پاکستان پر اعتماد کرنے پر سعودی قیادت کی شکر گزار ہوں، میں نے اپنی جلاوطنی کے دنوں میں جدہ میں کئی سال گزارے، میں کہہ سکتی ہوں کہ جدہ کو بھی اتنا ہی جانتی ہوں جتنا لاہور کو۔
انہوں نے مزید کہا کہ پاکستان اور سعودی عرب کے برادرانہ تعلقات پوری مسلم دنیا کے لیے مثالی ہیں، سعودی عرب پوری مسلم امہ کے لیے ایک مثالی حیثیت رکھتا ہے، پاکستان اور سعودی عرب کے درمیان باہمی اتحاد اور بھائی چارے کا رشتہ ہے، سعودی عرب اور پاکستان کے درمیان دفاعی معاہدے کو عوام نے بے پناہ سراہا، وفد کی آمد پنجاب کے لیے خوش بختی کی علامت ہے۔
مریم نواز کا کہنا تھا کہ پنجاب حکومت جدید خطوط پر کام کر رہی ہے، خادم الحرمین شریفین کے ساتھ پاکستان کے تعلقات کو نئی جہت لے جائیں گے، سرمایہ کاروں کو بہترین سہولتیں فراہم کر رہے ہیں، دورہ سعودی عرب میں وزیرِ اعظم کو اعلیٰ سطح کا پروٹوکول دینے پر شکر گزار ہیں۔
اِن کا مزید کہنا تھا کہ مکہ مکرمہ اور مدینہ منورہ ہمیں اپنی جان سے بھی زیادہ عزیز ہیں، مکہ مکرمہ اور مدینہ منورہ کی پاسبانی کی ذمے داری پاکستان کے لیے اعزاز ہے، پاکستان ہر وقت سعودی عرب کے ساتھ کھڑا ہے۔
وزیر اعلیٰ پنجاب نے یہ بھی کہا کہ سیلاب میں پنجاب حکومت نے عوام کی بحالی کے لیے دن رات کام کیا، پنجاب کی ترقی اور خوشحالی میں سعودی سرمایہ کاروں کا اہم کردار ہوگا، سعودی سرمایہ کاروں کو ون ونڈو کے تحت سہولتیں دیں گے، زراعت ، لائیو اسٹاک، صنعت کاری اور انفرا اسٹرکچر میں سرمایہ کاری کے مواقع موجود ہیں، پنجاب، پاکستان کی معاشی ترقی کے لیے ریڑھ کی ہڈی کی حیثیت رکھتا ہے۔
اس دوران پرنس منصور بن محمد آل سعود نے کہا کہ پنجاب آمد پر بہترین استقبال کے لیے شکر گزار ہیں، پنجاب میں سرمایہ کاری کے لیے پُرعزم ہیں، سعودی عرب اور پاکستان کے درمیان نئے دور کا آغاز ہو چکا ہے۔
پرنس منصور بن محمد کا کہنا تھا کہ سعودی سرمایہ کاروں کو بہت پہلے پاکستان آنا چاہیے تھا، پنجاب کی زمینیں زرخیز ہیں، پنجاب کے ساتھ شراکت داری بہت اہمیت کی حامل ہے، پنجاب ہماری سرمایہ کاری کے لیے بہت اہم ہے۔
اِن کا کہنا تھا کہ پنجاب میں موجود سرمایہ کاری کے مواقعوں سے فائدہ اٹھائیں گے، آئی ٹی کے شعبے میں بھی ہم سرمایہ کاری کے خواہش مند ہیں، صحت کے شعبے میں پاکستان کے ساتھ شراکت داری کےخواہش مند ہیں، ہاؤسنگ کے شعبے میں بھی سرمایہ کاری کی خواہش ہے، گھروں کی تعمیر کے لیے جدید طریقۂ کار اور ٹیکنالوجی ضروری ہے۔
پرنس منصور بن محمد آل سعود نے یہ بھی کہا کہ پنجاب میں دس لاکھ گھروں کی تعمیر کا منصوبہ زیر غور ہے، پاکستان کے ساتھ ٹورازم کے شعبے میں بھی تعاون بڑھانا چاہتے ہیں۔
