فرمان الہی
نماز کے اوقات
بھارتی فلم انڈسٹری کے ممتاز اداکار اور بالی ووڈ کے لیجنڈ دھرمیندر چل بسے۔
بھارتی میڈیا کے مطابق 89 سالہ معروف اداکار گزشتہ کچھ عرصے سے علیل تھے، گزشتہ دنوں ان کو سانس سے متعلق شدید تکالیف کےباعث اسپتال میں داخل کیا گیا تھا۔
بھارتی میڈیا کا کہنا ہے کہ دھرمیندر کی اہلیہ اداکارہ ہیما مالنی اور بیٹی ایشو دیول شمشان گھاٹ پہنچ گئی ہیں جبکہ امیتابھ بچن، ابھیشک بچن اور عامر خان بھی شمشان گھاٹ میں موجود ہیں۔
رپورٹس کے مطابق دھرمیندر نے آخری بار اپنی اداکاری کے جوہر فلم ’اکیس‘ میں دکھائے جو 25 دسمبر کو ریلیز ہونے والی ہے۔
دھرمیندر سنگھ دیول 1935 کو بھارتی پنجاب میں پیدا ہوئے، انہوں نے متعدد بلاک بسٹر فلموں سمیت 306 فلموں میں کام کیا۔
دھرمیندر نے 1958 میں فلم دل بھی تیرا ہم بھی تیرے سے فلمی کیریئر کا آغاز کیا، اپنی شاندار اداکاری اور منفرد انداز کے باعث وہ جلد ہی ناظرین کے دلوں پر چھا گئے۔
دھرمندر کو ہی مین آف انڈین سنیما کے لقب سے بھی یاد کیا جاتا ہے، انہوں نے شعلے، چپکے چپکے، دھرم ویر، سیتا اور گیتا اور یادوں کی بارات جیسی کلاسک فلموں سے بھارتی سنیما میں ناقابلِ فراموش مقام حاصل کیا۔
دھرمندر کا کیریئر چھ دہائیوں پر محیط رہا، جس دوران انہوں نے اپنی پرفارمنس، قدرتی دلکشی اور بے مثال ورسٹائل اداکاری کے ذریعے ناظرین کے دلوں میں اپنی خاص پہچان بنائی۔
انہوں نے ایکشن سے لے کر دل کو چھو لینے والی کامیڈی اور جذباتی ڈراموں تک میں شاندار کردار ادا کیے اور بھارتی سنیما کی تاریخ کے چند یادگار کردار تخلیق کیے۔
