فرمان الہی
نماز کے اوقات
سردیوں میں بھوک کا بڑھ جانا ایک عام بات ہے، ٹھنڈے موسم میں چائے زیادہ بھاتی ہے۔ پراٹھے ناگزیر محسوس ہوتے ہیں اور کافی کے کپ بھی بےحساب پیئے جاتے ہیں، یہی عادات اکثر اضافی کیلوریز بڑھا دیتی ہیں اور نتیجے میں وزن میں بڑھ جاتا ہے۔
موسمِ سرما میں وزن بڑھنے کے ڈر سے اب مزیدار اور لذیذ غذائیں چھوڑنے کی ضرورت نہیں ہے، چند مشروبات کا سمجھداری سے انتخاب وزن اور ہاضمے دونوں کے لیے فائدہ مند ثابت ہوسکتا ہے۔
اس موسم میں صحت کے لیے مفید کچھ مشروبات گھر میں ہی بنائے جا سکتے ہیں جو ناصرف جسم کا درجۂ حرارت زیادہ رکھتے ہیں بلکہ نظامِ ہاضمہ بہتر بناتے ہیں، توانائی کو متوازن رکھتے ہیں اور میٹابولزم کو معاونت دیتے ہیں۔
ہر گھر کے کچن میں موجود ہلدی، اجوائن، زیرہ، سونف، ادرک اور دارچینی جیسے مسالے جسم میں حرارت پیدا کرتے ہیں، مرغن غذاؤں کے استعمال کے بعد ہاضمہ بہتر بناتے ہیں اور سرد موسم میں سستی کم کرنے میں مدد دیتے ہیں۔
سردیوں میں وزن کم کرنے میں مدد دینے والے 5 گرم دیسی مشروبات
اجوائن اور زیرے کا گرم پانی
اجوائن اور زیرے کا استعمال نظامِ ہاضمہ کو فعال کرتا ہے، گیس اور اپھار کم کرتا ہے اور میٹابولزم بہتر بناتا ہے۔
ترکیب: ایک چمچ اجوائن اور ایک چمچ زیرہ پانی میں اُبال کر نیم گرم حالت میں پیئیں۔
ہلدی والا دودھ
رات کو ہلدی دودھ پینا جسم کو آرام دیتا ہے، ہاضمہ بہتر کرتا ہے اور سردیوں میں بڑھنے والی میٹھے کی خواہش کو کم کرنے میں مدد دیتا ہے۔
ترکیب: دودھ گرم کریں، اس میں ہلدی، ایک چٹکی کالی مرچ اور شہد ملا کر پی لیں۔
ادرک کی چائے
جب آپ سست یا غیر ضروری بھوک محسوس کریں، تو ادرک کی چائے کا استعمال کر سکتے ہیں، یہ اندرونی حرارت بڑھا کر چربی کو پگھلانے میں مدد دیتی ہے اور بھوک کم کرتی ہے۔
ترکیب: پانی میں ادرک کے چند ٹکڑے اُبال کر اسے نیم گرم پیئیں۔
سونف کی چائے
سونف کا مشروب پیٹ کی گیس، بوجھل پن اور واٹر ریٹینشن کم کرتا ہے، یہ ہاضمہ بھی بہتر بناتا ہے۔
ترکیب: پسی ہوئی سونف گرم پانی میں ڈال کر چند منٹ کے لیے بھگوئیں اور پی لیں۔
دارچینی اور شہد کا مشروب
دارچینی خون میں شکر کی سطح کو متوازن رکھتی ہے جس سے اچانک بھوک لگنے کے امکانات کم ہوتے ہیں، صبح اس مشروب کا استعمال توانائی متوازن رکھتا ہے۔
ترکیب: نیم گرم پانی میں دارچینی پاؤڈر اور تھوڑا سا شہد شامل کرلیں اور اب اسے چسکیوں کے ساتھ پئیں۔
نوٹ: یہ ایک معلوماتی مضمون ہے، اپنی کسی بھی بیماری کی تشخیص اور اس کے علاج کےلیے ڈاکٹر سے رجوع کریں۔
