فرمان الہی
نماز کے اوقات
سری لنکا کے 1996ء کرکٹ ورلڈ کپ کے فاتح کپتان اور سابق وزیرِ پیٹرولیم ارجونا راناٹنگا کو ایک بڑے کرپشن کیس میں گرفتار کیے جانے کا امکان ہے، حکومت کا کہنا ہے کہ ان کی وطن واپسی پر انہیں حراست میں لیا جائے گا۔
غیر ملکی میڈیا کی ایک رپورٹ کے مطابق سابق کپتان راناٹنگا اس وقت ملک سے باہر ہیں، اِن پر الزام ہے کہ انہوں نے اپنے بھائی کے ساتھ مل کر تیل کی طویل مدتی خریداری کے طریقہ کار میں تبدیلی اور مہنگے داموں اسپاٹ خریداری کی گئی۔
یہ خریداری 2017ء میں کی گئی تھی جس کے باعث سری لنکا کو تقریباً 80 کروڑ سری لنکن روپے کا نقصان ہوا۔
بین الاقوامی میڈیا کے مطابق سیلون پیٹرولیم کارپوریشن کے سابق چیئرمین، ارجونا راناٹنگا کے بڑے بھائی دھمیکا راناٹنگا کو پیر کے روز گرفتار اور بعدازاں ضمانت پر رہا کردیا گیا تھا تاہم عدالت نے ان پر بیرونِ ملک سفر کی پابندی عائد کر دی ہے۔
دھمیکا راناٹنگا سری لنکا اور امریکا کی دوہری شہریت رکھتے ہیں۔ عدالت نے اس کیس کی اگلی سماعت آئندہ سال 13 مارچ کو مقرر کی ہے۔
واضح رہے کہ 62 سالہ ارجونا راناٹنگا سری لنکن کرکٹ کی تاریخ کا ایک بڑا نام ہیں جنہوں نے 1996ء میں آسٹریلیا کو شکست دے کر سری لنکا کو اس کا واحد کرکٹ ورلڈ کپ جتوایا تھا۔
یہ مقدمہ گزشتہ برس اقتدار میں آنے والی صدر انورا کمارا ڈسانائیکے کی حکومت کی جانب سے جاری کرپشن کے خلاف وسیع مہم کا حصہ ہے۔
