فرمان الہی
نماز کے اوقات
پاکستان کے ایک کبڈی کھلاڑی کے بھارتی ٹیم کی جانب سے کھیلنے، شرٹ پہننے اور بھارتی جھنڈا لہرانے پر پاکستان کبڈی فیڈریشن کی جنرل کونسل نے ہنگامی اجلاس طلب کر لیا۔
اس حوالے سے پاکستان کبڈی فیڈریشن کے سیکریٹری رانا سرور نے کہا کہ چئیرمین چوہدری شافع حسین نے 27 دسمبر کو اجلاس طلب کیا ہے۔
انہوں نے کہا کہ بحرین میں ہونے والے ٹورنامنٹ میں پاکستان کے 16 کھلاڑیوں نے شرکت کی، پاکستان کی یہ قومی ٹیم نہیں تھی اور نہ ہی اس کی اجازت طلب کی گئی تھی۔
رانا سرور کا کہنا تھا کہ یہ ایک خود ساختہ ٹیم تھی، پاکستان کا نام استعمال کیا گیا، ایونٹ میں شرکت کے لیے نہ حکومت سے اجازت لی گئی اور نہ ہی فیڈریشن کو بتایا گیا۔
پاکستان کبڈی فیڈریشن کے سیکریٹری نے کہا کہ قومی کھلاڑی کا بھارتی ٹیم کی جانب سے کھیلنا اور جھنڈا لہرانا ناقابل برداشت ہے، معاملے کی تحقیقات کی جائیں گی اور سخت ترین ایکشن لیا جائے گا۔
ان کا کہنا تھا کہ خودساختہ پروموٹرز کے خلاف بھی ایکشن لیں گے، کسی کو غیرقانونی ایونٹ کی اجازت نہیں دیں گے، کسی صورت میں پاکستان کا نام بدنام کرنے کی اجازت نہیں دی جائے گی۔
انہوں نے کہا کہ کلبز میں کئی ممالک کے کھلاڑی ایک ساتھ کھیلتے ہیں۔
