فرمان الہی
نماز کے اوقات
پروفیشنل اسکواش ایسوسی ایشن (پی ایس اے) کراچی اوپن گولڈ چیمپئن شپ کے کواٹر فائنل میں پاکستان کے نور زمان کو بھی شکست کا سامنا کرنا پڑ گیا، پاکستان کے تینوں کھلاڑی ایونٹ سے باہر ہوگئے۔
کراچی میں جاری ایونٹ کے کوارٹر فائنل میں پاکستان کے نور زمان کو شکست کا سامنا کرنا پڑا، انہیں انگلینڈ کے محمد الشوربگے نے شکست دیکر سیمی فائنل میں جگہ بنائی۔
مینز اور ویمنز ایونٹ میں مصر کے 5 کھلاڑیوں نے سیمی فائنل کےلیے کوالیفائی کیا، سیمی فائنل کل کھیلے جائیں گے، جیو سوپر سے میچز براہ راست نشر کئے جائیں گے ۔
ڈی ایچ اے کریک کلب جاری اسکواش چیمپئن شپ کی سیمی فائنل لائن اپ مکمل ہوگئی۔
کوارٹر فائنل میں پاکستان کے نور زمان کا مقابلہ انگلینڈ کے نمبر 4 سیڈ محمد الشوربگے سے ہوا، پہلے 2 گیمز محمد الشوربگے نے 11،2 اور 11،8 سے جیتے۔
اس کے بعد نور زمان نے کم بیک کیا، تیسرا گیم 11،6 اور چوتھا گیمز 11،8 سے جیت کر مقابلہ 2۔2 سے برابر کردیا، پانچویں اور فیصلہ کن گیم میں بھی زبردست مقابلہ ہوا، لیکن ورلڈ نمبر 9 محمد الشوربگے نے 11،9 کی جیت کے ساتھ سیمی فائنل کیلئے کوالیفائی کرلیا ۔
اس سے پہلے کھیلے گئے کوارٹر فائنل میں مصر کے محمد زکریا نے ہانگ کانگ کے الیکس لیو کو شکست دے دی۔
ویمنز کوارٹر فائنل میں ملائیشیا کی عافیہ ازمان نے مصر کی نمبر 3 سیڈ فیروز ابولخیر کو اسٹریٹ گیمز سے ہرادیا،عافیہ ازمان کی کامیابی کا اسکور 11،9 ، 13،11 اور 11،3 رہا۔
ایک اور کوارٹر فائنل میں ملائیشیا کی نمبر 2 سیڈ سیوا سانگری نے انگلینڈ کی لوک ٹورمے کو اسٹریٹ گیمز سے ہرایا۔
