فرمان الہی
نماز کے اوقات
پنجاب پولیس نے کرائم کنٹرول ڈیپارٹمنٹ (سی سی ڈی) پر جعلی پولیس مقابلوں کے تمام الزامات بے بنیاد قرار دے دیے۔
لاہور ہائی کورٹ کے حکم پر پولیس نے اپنی تحریری رپورٹ جمع کروادی جس کے مطابق سی سی ڈی کے قیام کے بعد ڈکیتی، چوری اور قتل سمیت دیگر جرائم میں کمی آئی ہے۔
پولیس رپورٹ کے مطابق 7 ماہ میں سی سی ڈی کی کارروائیوں سے پراپرٹی سے متعلق جرائم 64 فیصد کم ہوئے، ڈکیتی اور قتل کے واقعات میں بھی 60 فیصد کمی دیکھی گئی ہے۔
پولیس رپورٹ میں کہا گیا ہے کہ 2024 میں ڈکیتی کے 792 اور 2025 میں 324 واقعات رپورٹ ہوئے، ڈکیتی کے کیسز کی شرح میں 69 فیصد کمی آئی ہے۔
پولیس کی جانب سے جمع کروائی گئی رپورٹ میں کہا گیا کہ راہزنی کے واقعات 41 ہزار سے کم ہو کر 18 ہزار 608 رہ گئے ہیں اور ان میں 62 فیصد کمی آئی ہے۔
رپورٹ کے مطابق گاڑیاں چھیننے کے واقعات میں 64 فیصد، کار چوری کے واقعات میں 60 فیصد، موٹرسائیکل چھیننے کے واقعات میں 53 فیصد کمی ہوئی ہے۔
رپورٹ میں بتایا گیا ہے کہ ڈکیتی بمعہ قتل کے کیسز 170 سے کم ہوکر 96 ہوئے اور ان میں 60 فیصد کمی دیکھی گئی ہے۔
پولیس رپورٹ کے مطابق سی سی ڈی آپریشنز میں ایک سب انسپکٹر شہید اور 96 پولیس اہلکار زخمی ہوئے، سی سی ڈی پر الزامات سوشل میڈیا افواہوں پر مبنی ہیں، ان کا حقائق سے کوئی تعلق نہیں۔
رپورٹ کے مطابق سی سی ڈی تمام جرائم پیشہ عناصر کے خلاف بلاتفریق کارروائیاں کرتی ہیں، گرفتاریوں، شفاف تفتیش اور قانونی تقاضوں کے مطابق پراسیکیوشن یقینی بنائی جاتی ہے۔
