فرمان الہی
نماز کے اوقات
بلوچستان کے شمال بالائی علاقے رات گئے پھر سے برفانی طوفان کی زد میں آگئے، زیارت جانے والے سیاحوں کی درجنوں گاڑیاں کوئٹہ زیارت شاہراہ پر پھنس گئیں۔
100 سے زائد سیاح گاڑیوں میں موجود ہیں، برفانی طوفانی سے این 50 شاہراہ کئی مقامات پر برف جم جانے سے بلوچستان سے پنجاب اور خیبر پختونخوا جانے والی ٹریفک پھنس گئی، مختلف حادثات میں 27 افراد زخمی ہوگئے۔
کوژک ٹاپ کے مقام پر شدید سائیبرین ہوائیں چلنے سے این 25 چمن کوئٹہ کراچی شاہراہ پر درجہ حرارت منفی 12 تک گر گیا، شیلا باغ کے قریب پھسلن سے کئی گاڑیاں آپس میں ٹکرا گئیں، دو افراد جاں بحق اور 7 زخمی ہوگئے۔
کوئٹہ میں رواں موسم سرما کی پہلی برفباری ہوئی، وادی میں دن بھر برف روئی کے گالوں کی طرح پڑتی رہی۔ پہاڑوں نے برف کی سفید چادر اوڑھ لی۔
مختلف اضلاع میں برف باری کے باعث شاہراہوں پر ٹریفک کی روانی متاثر ہے، سندھ اور پنجاب کے مختلف شہروں میں بھی ہلکی اور تیز بارش کا سلسلہ جاری ہے۔
بلوچستان کے شمالی علاقوں میں شدید برف باری سے نظامِ زندگی مفلوج ہو کر رہ گیا ہے، چمن شہر میں 35 سال بعد ہونے والی شدید برف باری سے شہری گھروں میں محصور ہو کر رہ گئے ہیں۔
کوژک ٹاپ، شیلا باغ، خواجہ عمران، کوہِ سلیمان، قلعہ عبداللہ، زیارت، پشین، مسلم باغ، قلعہ سیف اللہ، لورالائی اور دیگر علاقوں میں بھی وقفے وقفے سے برف باری جاری ہے۔
قلات میں سال کی پہلی برفباری کے باعث موسم شدید سرد ہوگیا۔ مقامی لوگ سال کی پہلی برف باری سے لطف اندوز ہونے کیلئے مختلف پوائنٹس پر پہنچ گئے۔
برف باری کے باعث شاہراہوں پر ٹریفک کی روانی متاثر ہے، این ایچ اے، پی ڈی ایم اے اور ضلعی انتظامیہ کی جانب سے مشترکہ کلیئرنس آپریشن جاری ہے۔
خضدار، لسبیلہ سمیت دیگر علاقوں میں بھی ہلکی اور تیز بارش کا سلسلہ جاری ہے۔
سکھر، لاڑکانہ، گھوٹکی، خیرپور، نوابشاہ، نوشہرو فیروز اور جیکب آباد سمیت سندھ کے مختلف علاقوں میں بارش کے باعث سردی کی شدت میں اضافہ ہوگیا۔
سرگودھا، ملتان، ڈی جی خان، میانوالی، لیہ، خیبر پختونخوا کے ضلع بنوں، خیبر، کوہاٹ، شمالی و جنوبی وزیرستان، کرک، ملاکنڈ میں بھی بارش کا سلسلہ جاری ہے۔
کراچی کے مختلف علاقوں میں تیز ہواؤں کے ساتھ موسم سرما کی دوسری بارش ہوئی، بارش کے بعد کراچی کا موسم سرد اور فضائیں صاف ہوگئیں۔
سندھ اور پنجاب کے مختلف شہروں میں بھی ہلکی اور تیز بارش سے موسم سرد ہوگیا، اسلام آباد، پشاور اور لاہور میں بھی بارش ہوئی۔
