فرمان الہی
نماز کے اوقات
فتنہ الہندوستان کے دہشتگردوں کے بلوچستان میں 12 مقامات پر حملے ناکام بنادیے گئے، اس کارروائی میں متعدد دہشت گرد ہلاک ہوئے جس کے بعد ان کا تعاقب کیا گیا اور مزید دہشت گردوں کی ہلاکت کے بعد ہفتے کی صبح سے اب تک ہلاک دہشت گردوں کی تعداد 67 ہو گئی ہے۔
جمعے کے روز بھی 41 دہشت گرد مارے گئے تھے۔ یوں دو روز میں ہلاک دہشت گردوں کی تعداد 108 ہو گئی ہے۔
سیکیورٹی ذرائع کے مطابق رات گئے فتنہ الہندوستان کے دہشت گردوں نے بلوچستان کے متعدد مقامات پر بزدلانہ حملے کیے، جن میں سیکیورٹی اداروں اور پولیس کے 10 جوان شہید ہوئے۔
دہشت گردوں نے گوادر میں بلوچ مزدور خاندان کے 5 افراد کو بھی شہید کر دیا جن میں 1 خاتون اور 3 بچے بھی شامل ہیں۔
سیکیورٹی ذرائع نے بتایا کہ سیکیورٹی فورسز اور دیگر قانون نافذ کرنے والے اداروں نے تمام حملے ناکام بنا دیے، سیکیورٹی فورسز کا مختلف لوکیشنز پر دہشت گردوں کا تعاقب تاحال جاری ہے۔
سیکیورٹی ذرائع کا کہنا ہے کہ کارروائیوں میں مزید دہشت گردوں کی ہلاکتیں اور نقصانات کی بھی اطلاعات ہیں۔
وزیرِ اعظم شہباز شریف نے فتنہ الہندوستان کی کوئٹہ، نوشکی، دالبندین، پسنی اور گوادر میں کارروائیاں ناکام بنانے پر سیکیورٹی فورسز کی پذیرائی کی اور ملک کی خاطر زندگی قربان کرنے والے شہداء کے بلند درجات اور ان کے اہلِ خانہ کے لیے صبر کی دعا کی۔
اس حوالے سے انہوں نے کہا کہ مجھ سمیت پوری قوم کو اپنے شہداء پر فخر ہے، سیکیورٹی فورسز کے افسران اور جوان وطن کی حفاظت میں مصروفِ عمل ہیں۔
وزیرِ اعظم نے کہا کہ دہشتگردی کی عفریت کے مکمل خاتمے تک اس کے خلاف جنگ جاری رکھیں گے، پاکستان کی حفاظت کے عزم میں مجھ سمیت پوری قوم افواجِ پاکستان کے شانہ بشانہ ہے۔
وزیر داخلہ محسن نقوی نے بلوچستان میں فتنہ الہندوستان کے دہشت گردوں کے حملوں کی مذمت کرتے ہوئے حملے ناکام بنانے پر سیکیورٹی فورسز اور قانون نافذ کرنے والے اداروں کو خراجِ تحسین پیش کیا ہے۔
محسن نقوی نے کہا کہ پاکستان کے بہادر سپوتوں نے بروقت اور مؤثر کارروائی میں دہشت گردوں کو جہنم رسید کیا، دہشت گردوں کے ناپاک عزائم کو خاک ملانے والے بہادر سپوتوں کو سلام پیش کرتا ہوں۔
وفاقی وزیر نے حملے ناکام بناتے ہوئے جامِ شہادت نوش کرنے والے جوانوں کو خراجِ عقیدت پیش کرتے ہوئے کہا کہ بہادر سپوتوں نے جان دے کر بھارتی اسپانسرڈ دہشت گردوں کے مذموم عزائم کو ناکام بنایا۔
انہوں نے کہا کہ قوم کو اپنے بہادر بیٹوں پر ناز ہے، جامِ شہادت نوش کرنے والے جوان قوم کے ہیرو ہیں، شہداء کی عظیم قربانیوں کو ہمیشہ یاد رکھا جائے گا۔
