فرمان الہی
نماز کے اوقات
چیئرمین پاکستان تحریک انصاف (پی ٹی آئی) بیرسٹر گوہر نے وفاقی وزیر اطلاعات عطا تارڑ کے بیان کو انتہائی غیر ذمے دارانہ قرار دیا ہے۔
ایک بیان میں بیرسٹر گوہر نے کہا کہ آج لوگ جنازے اٹھا رہے ہیں، سوگ منا رہے ہیں اور قوم کو یکجہتی کی ضرورت ہے، اس وقت دہشت گردی پر یک زبان ہو کر مذمت کی ضرورت ہے۔
انہوں نے کہا کہ ایسے وقت میں وزیر اطلاعات کا بیان قوم کے اتفاق اور یکجہتی کو سبوتاژ کرنے کے مترادف ہے، گزشتہ روز قوم سے اپیل کی کہ خون کہیں بھی گرے یہ بلا تفریق سب کا خون ہے۔
بیرسٹر گوہر نے مزید کہا کہ ہم ایسے واقعات کی بغیر اگر مگر کے بھر پور مذمت کرتے ہیں، ایسے بیانات سے دہشت گردوں کو تقویت ملے گی لہٰذا ہمیں دشمن کے خلاف صف آراء ہونا ہوگا۔
اُن کا کہنا تھا کہ پی ٹی آئی اور ہم ایسے فعل کی ہر صورت مذمت کرتے ہیں، جنازوں کے وقت ایسے بیان دینے پر وزیر اطلاعات قوم سے معافی مانگیں۔
خیال رہے کہ لاہور میں علماء کے ہمراہ پریس کانفرنس میں عطا تارڑ نے کہا تھا کہ اب ملک میں یہ جو دہشت گردی واپس آئی ہے اس کے پیچھے پی ٹی آئی ہے۔
انہوں نے کہا کہ دہشت گردوں کا کوئی دین اور مذہب نہیں ان کا نظریہ صرف دہشت پھیلانا ہے، مساجد، امام بارگاہوں اور دیگر مراکز کی حفاظت کے لیے بھرپور اقدامات کر رہے ہیں۔
عطا تارڑ نے کہا کہ یہ بات واضح ہو چکی ہے کہ خودکش حملہ آور افغانستان گیا تھا، ہم ہر حال میں دہشت گردوں کا تعاقب کریں گے، دہشت گردوں کے لیے کوئی گنجائش نہیں، ان کا خاتمہ کر کے ہی دم لیں گے۔
