فرمان الہی
نماز کے اوقات
سری لنکن بلے باز بھانوکا راجہ پاکسے کے بھارتی کھلاڑیوں کے بلّوں سے متعلق بیان نے ٹی20 ورلڈ کپ 2026ء کے دوران سوشل میڈیا پر نیا ہنگامہ برپا کر دیا۔
راجہ پاکسے کے ایک انٹرویو کو بعض صارفین نے بھارتی ٹیم پر ’بیٹ ٹیمپرنگ‘ کا الزام قرار دیا ہے، جس کے بعد شدید ردِعمل سامنے آیا ہے، تاہم بعد ازاں سری لنکن کھلاڑی نے وضاحت جاری کرتے ہوئے کہا کہ میرے بیان کو غلط انداز میں پیش کیا گیا اور کچھ باتیں ترجمے میں درست طور پر منتقل نہیں ہو سکیں۔
راجہ پاکسے نے سوشل میڈیا پلیٹ فارم ایکس (سابقہ ٹوئٹر) پر وضاحت کرتے ہوئے کہا کہ بھارتی کرکٹ اپنے نظام، انفرااسٹرکچر اور آلات کے معیار کے لحاظ سے بے حد ترقی یافتہ ہے، ان کے بیٹ بنانے والے دنیا کے بہترین اداروں میں شمار ہوتے ہیں۔
انہوں نے اعتراف کیا کہ مجھے انٹرویو کے دوران زیادہ واضح الفاظ استعمال کرنے چاہیے تھے تاکہ کسی قسم کی غلط فہمی پیدا نہ ہو۔
قبل ازیں ایک انٹرویو میں راجہ پاکسے نے بھارتی کھلاڑیوں کے استعمال شدہ بلّوں کے حوالے سے سوال اٹھایا تھا۔
ایک موقع پر گفتگو کرتے ہوئے ان کا کہنا تھا کہ بھارتی بلے باز ایسے بلّے استعمال کر رہے ہیں جو دیگر ٹیموں کے مقابلے میں کہیں زیادہ طاقت پیدا کرتے ہیں۔
انہوں نے کہا تھا کہ بھارتی کھلاڑیوں کے پاس ایسے بلّے ہیں جو ہمیں دستیاب بہترین بلّوں سے بھی کہیں بہتر ہیں، ایسا محسوس ہوتا ہے جیسے ان پر ربڑ کی ایک تہہ چڑھائی گئی ہو، میں نہیں سمجھ سکتا کہ یہ کیسے ممکن ہے کہ یہ بلّے دیگر ٹیموں کو دستیاب بھی نہیں، تمام کھلاڑی اس بات سے واقف ہیں۔
