فرمان الہی
نماز کے اوقات
یمن کے حوثیوں نے سعودی ایف-15 لڑاکا طیارہ مار گرائے جانے کی ویڈیو جاری کر دی۔
تقریباً 4 منٹ دورانیے کی ویڈیو میں مختلف مناظر کو یکجا کیا گیا ہے، جس میں طیارے کو نشانہ بنائے جانے کے مناظر اور اس کے ملبے کو شعلوں میں جلتے ہوئے دکھایا گیا ہے۔
ویڈیو کا آغاز طیارے کو نشانہ بنائے جانے کے مناظر سے ہوتا ہے، جس کے بعد رات کے وقت زمین پر شدید آگ بھڑکنے اور دھویں کے بادل اٹھنے کے مناظر دکھائے جاتے ہیں، جو بظاہر طیارہ گرنے کے فوری بعد کی صورتِ حال ہے۔
بعد ازاں دن کے وقت کی فوٹیج میں پتھریلے صحرائی علاقے میں طیارے کے بکھرے ہوئے، ٹوٹے پھوٹے اور جلے ہوئے دھاتی ملبے کو دکھایا گیا ہے۔
ویڈیو میں طیارے کے جلے ہوئے ڈھانچے کے مختلف حصوں کے قریب سے مناظر بھی شامل ہیں، جبکہ ایک بڑے عمودی دم نما حصے پر ایسے نشانات دکھائی دیتے ہیں جو سعودی طیاروں سے مطابقت رکھتے ہیں۔
ملبے کے اردگرد فوجی وردیوں اور یمنی لباس کے امتزاج میں ملبوس مسلح افراد بھی دکھائی دیتے ہیں، جن میں سے بعض کے ہاتھوں میں رائفلیں ہیں، جبکہ 1 شخص طیارے کے ملبے کی جانب اشارہ کرتا نظر آتا ہے۔
ویڈیو میں حوثی جنگجوؤں کو گاڑیوں میں صحرائی علاقے سے تیزی سے گزرتے ہوئے بھی دکھایا گیا ہے، ایک موقع پر انہیں آگے بڑھنے والی ایک گاڑی پر فائرنگ کرتے ہوئے دیکھا جا سکتا ہے۔
ایک جنگجو کو یہ کہتے ہوئے سنا جا سکتا ہے کہ ہم اب ان شاء اللّٰہ! دشمن کا راستہ کاٹنے کے لیے ایک کارروائی کر رہے ہیں۔
واضح رہے کہ یمن کے حوثیوں نے گزشتہ روز دعویٰ کیا تھا کہ سعودی لڑاکا طیارہ ایف 15 مأرب کے علاقے میں اس وقت مار گرایا جب وہ دشمن کارروائیوں میں مصروف تھا۔
حوثیوں کا کہنا تھا کہ طیارے کو مقامی طور پر تیار کردہ ہوا سے ہوا میں مار کرنے والے میزائل کے ذریعے نشانہ بنایا گیا ہے۔
