پاکستان نژاد باکسر سحر اقبال خان پروفیشنل باکسنگ کے پہلے مقابلے میں کامیاب

آج کا اخبار

یورپ سے

23 اپریل ، 2018

بولٹن(نمائندہ جنگ) پاکستان نژاد برطانوی باکسر سحر اقبال خان نے پریسٹن ایرنیا میں ہونے والا باکسنگ کا مقابلہ چوتھے راؤنڈ میں آسانی سے جیت لیا، پروفیشنل باکسر کی حیثیت سے یہ ان کی پہلی فائٹ تھی۔ 21 سالہ سحر اقبال خان کا مقابلہ برمنگھم کے 23 سالہ حقائن گیس سے تھا۔ پہلے راؤنڈ میں ہی سحر اقبال خان نے اپنے حریف پر مکوںکی بارش کر دی جس سے ان کے مد مقابل رنگ میں گرتے گرتے بچے، جب دوسرا راؤنڈ شروع ہوا تو ان کے مد مقابل سحر اقبال خان کے تابڑ توڑ مکوں سے گھبرائے ہوئے تھے جس سے ایسا لگ رہا تھا کہ وہ سحر اقبال خان کے سامنے زیادہ دیر نہیں ٹھہرسکیں گے۔ تیسرا رائونڈ شروع ہوتے ہی سحر اقبال خان نے اپنے حریف کوایک زور دار مکا مارا جس سے وہ اپنے حواس قائم نہ رکھ سکا اور رنگ کے ایک کونے میں کھڑے ہوکر خود کو زمین پر گرنے سے بچالیا لیکن چوتھے رائونڈ کے ابتدائی مراحل میں ان کی آنکھوں میں اندھیرا چھانے لگا، ریفری نے صورتحال کا جائزہ لیتے ہوئے سحر اقبال خان کو پوائنٹس کی برتری پر فاتح قرار دے دیا۔ سحر اقبال خان نے اپنی فائٹ کے بعد جنگ سے گفتگو کرتے ہوئے بتایا کہ یہ کامیابی اللہ کے فضل اور والدین کی دعاؤں کا نتیجہ ہے، شایقین کی امیدوں پر پورا اتر کر دلی خوشی ہوئی اور آئندہ بھی اسی طرح کامیابیاں حاصل کرنے کی کوشش کروں گا۔ شائقین کا کہنا تھا کہ سحر اقبال خان بھیسپر سٹار باکسر عامر خان کی طرح کامیاب ہوکر ملک وقوم کا نام روشن کریں گے۔

تازہ ترین