کامیاب طلباء کے لیے رہنما اصول

ذہانت انسان کو قدرت کی طرف سے عطا کردہ خصوصیات میں سے ایک ہے۔ اسی ذہانت کی بنیاد پرکئی طالب ِعلم تعلیم کے میدان میں آگے نکل جاتے ہیں۔ تاہم، اس سےزیادہ بڑی حقیقت بھی اپنا وجود رکھتی ہے، اور وہ ہے محنت، منصوبہ بندی اور لگن۔ اگر کسی میں یہ خصوصیات موجود ہوں تو وہ ذہین طالب علم سے بھی زیادہ آگے نکل سکتا ہے۔ اس کا مطلب یہ ہوا کہ اگر آپ ذہین نہیں ہیں تو اسے حصولِ تعلیم کی راہ میں رکاوٹ نہ سمجھیں۔

آج ہم آپ کے ساتھ کچھ ایسے مفید مشورے شیئر کرنے والے ہیں، جن پر عمل پیرا ہوکر آپ اپنے اسکول، کالج اور یونیورسٹی کے روشن طالب علم بن سکتے ہیں، اور اگر آپ ذہین ہیں تو آپ کو ان مشوروں پر تو ہر صورت عمل کرنا چاہیے، کیوں کہ ذہانت اور محنت اکٹھے ہوجائیں تو پھر آپ کو کوئی نہیں ہرا سکتا۔کیا آپ ناقابلِ شکست بننے کے لیے تیار ہیں؟

اسٹڈی پلان بنائیں اور اپنے سیشنز کا شیڈول ترتیب دیں

اگر آپ کامیاب طالب علم بننا چاہتے ہیں تو اتنا کافی نہیں کہ آپ ٹیسٹ اور امتحانات کی ڈیڈلائنز کو محض اپنے ذہن میں رکھے رہیں۔ آپ کو ایک واضح اور متوازن پلان بنانے کی ضرورت ہے، تاکہ امتحانات کے قریب آپ زیادہ پڑھائی کی وجہ سے تھک نہ جائیں اور آپ کو ساری ساری راتیں جاگ کر نہ پڑھنا پڑے۔جیسے ہی آپ کو ہر کلاس کا نصاب مل جائے، فوراً کیلنڈر اُٹھائیں اور ہر اہم سنگِ میل کے لیے ڈیڈلائن مارک کردیں۔

یاد رکھیں، آپ کا اسٹڈی پلان اور سیشنز کا شیڈول ایسا ہو کہ اس میں آپ روزانہ، مستقل مزاجی سے اپنی پڑھائی کو جاری رکھیں۔ اس کا فائدہ یہ ہوگا کہ تعلیم کے پورے عرصے کے دوران روزانہ محدود وقت کے لیے مستقل مزاجی کے ساتھ پڑھنے سے آپ کونصاب کو سمجھ کر پڑھنے اور یاد کرنے میں آسانی رہے گی اور کوئز یا ٹیسٹ یا امتحان سے ایک رات قبل ذہنی اذیت سے نہیں گزرنا پڑے گایا رات 3 بجے تک جاگ کر نہیں پڑھنا پڑے گا۔

پڑھنے کیلئے ایسی جگہ کا انتخاب کریں جہاں آپ ڈسٹرب نہ ہوں

کامیاب طلباء پڑھنے کے لیے ایسا ماحول بناتے ہیں، جہاں وہ حقیقتاً پوری توجہ کے ساتھ پڑھ سکیں۔ گھر میں پڑھنے کے لیے ایسا گوشہ تلاش کریں جہاں آپ کو تمام ضروری اشیاء جیسےکمپیوٹر، پرنٹر وغیرہ تک بلا رکاوٹ رسائی حاصل ہو۔ پڑھنے کے دوران رُخنے پڑنے سے آپ کی سوچ کا تسلسل ٹوٹ جاتا ہے اور آپ حاصل شدہ معلومات کو اپنے دماغ میں نہیں بٹھا پاتے۔ اہم بات؛ اپنے اسمارٹ فون اور سوشل میڈیا ایپس کو بند کردیں، کیوں کہ بار بار موبائل فون چیک کرنے سے آپ کبھی بھی پڑھائی پر توجہ مرکوز نہیں رکھ پائیں گے۔

ہدف مقرر کریں

آپ کو اس بات کا واضح علم ہونا چاہیے کہ ہر اسٹڈی سیشن سے آپ ایساکیا ہدف حاصل کرنا چاہتے ہیں، جو آپ کے مجموعی تعلیمی اہداف کے حصول میں اہم ثابت ہو۔ جیسے، اہم ناموں، تاریخوں اور موضوع یا پڑھنے کے اسائنمنٹس کا خاکہ تیار کریں۔

چیلنج سے مت گھبرائیں

کامیاب طلباء دانشورانہ چیلنج کے لیے ہر وقت خود کو تیار رکھتے ہیں۔ پڑھائی کرتے وقت، وہ اپنی سوچ میں انتہائی واضح ہوتے ہیں کہ وہ کیا پڑھ رہے ہیں اور کیوں پڑھ رہے ہیں۔ جب وہ کلاس میں جاتے ہیں، بحث و مباحثے میں شریک ہوتے ہیں اور سوالوں کے تفصیلی جوابات دیتے ہیں۔ مشکل مضامین اور اسائنمنٹس کو سیمسٹر کے شروع میں ہی لے لیتے ہیں۔ سیمسٹر کے شروع میں آپ تروتازہ ہوتےہیں اور مشکل مضامین اور اسائنمنٹس کو احسن طریقے سے بروقت مکمل کرسکتے ہیں۔ مشکل اسائنمنٹس پہلے مکمل کرکے آپ باقی کے پورے سیمسٹر میں پراعتماد رہتے ہیں اور اس اعتماد کے بل بوتے پر آپ کی مجموعی تعلیمی کارکردگی کئی گنا بہتر ہوجاتی ہے۔

کلاس یا پڑھائی سے پہلےکی ضروری تیاری

کسی بھی کلاس میں شرکت سے پہلے کلاس مٹیریل بغور پڑھ لیں، اسی طرح پڑھائی کرنے سے پہلے ریویو نوٹس (Review Notes)پڑھنے کی عادت کو پختہ کرلیں۔کامیاب طلباء، کلا س میں جو سیکھ کر آتے ہیں، گھر پر یا کلاس کے بعد اسے دوبارہ اچھی طرح پڑھتے اور سمجھتے ہیں، تاکہ دی گئی اسائنمنٹس کو ذہانت مندانہ طریقے سےمکمل کرسکیں، نئے تصورات (Concepts) سیکھ سکیں اور اگلی کلاس کے لیے خود کو مکمل طور پر تیار کرسکیں۔خود کو اگلی کلاس کے لیے اس طرح تیار کریں کہ آپ مزید معلومات کے لیے مؤثر، متاثرکن اور دلچسپ سوالات پوچھ سکیں۔ اہم بات: آپ نوٹس کااسی وقت اچھی طرح جائزہ لے سکتے ہیں، جب آپ دوران کلاس ٹیچر کے لیکچر سے اچھے نوٹس تیار کرکے آئیں گے۔

پرفیسرز اور کلاس میٹس کو انگیج کریں

آپ کے پروفیسر نے سیکھنے اور سمجھانے کے لیے جو مٹیریل دیا ہے، اس میں حقیقی دلچسپی ظاہر کریں۔ کلاس میں متعلقہ سوالات پوچھیں، دفتری اوقات میں پروفیسر کے آفس میں جائیں یا کلاس سے پہلے یا بعد میں ان کے ساتھ گفت و شنید کریں۔ ضرورت محسوس کریں تو پروفیسر یا ان کے کلاس اسسٹنٹ کو اسائنمنٹس پرمزید وضاحت کے لیے ای میل کریں۔ اسٹڈی گروپس میں وقت کا اچھا استعمال کریں۔ کلاس ڈسکشن یا اسٹڈی گروپ میں شامل ہونے سے آپ کو تصورات (Concepts) کو سمجھنے میں مدد ملے گی۔ اسی طرح، ان تصورات کو دیگر طلباء کو سمجھانے سے آپ کی گرفت مزید مضبوط ہوجائے گی۔

جذبات پر قابو رکھیں

اپنے گزشتہ ہفتے کے ٹیسٹ پیپر پر پروفیسر کے تنقیدی ریمارکس سے دلبرداشتہ نہ ہوں۔ وہ طلباء جو اپنی مثبت حاصلات (Achievements) پر توجہ مرکوز رکھتے ہوئے غلطیوں کو سُدھارنے پر کام کرتے ہیں، وہ اپنے ہم عصروں سے آگے نکل جاتے ہیں۔بنیادی بات یہی ہے کہ ناکامیوں سے گھبرانے کی ضرورت نہیں ہے، بلکہ یہی ناکامیاں آپ کو کامیابی کی راہ پر گامزن کرتی ہیں۔

اپنی صحت اور فٹنس کو نظرانداز نہ کریں

تین چیزوں کو اپنی زندگی میں کبھی نظرانداز مت کریں۔ رات کی اچھی نیند، اچھی غذاء اورکچھ ہلکی پھلکی جسمانی مشقت۔ تعلیم کے میدان میں کامیابی کے لیے صحت مند رہنا بنیادی چیز ہے، کیوں کہ کوئز، ٹیسٹ پیپر یا امتحان کے وقت بیماری کا عذر کام آنے والا نہیں، کیوں کہ صحت ہزار نعمت ہے۔