بڑھتی آبادی ایٹم بم،قابوکرنے کا خاکہ بنا کردیا جائے،چیف جسٹس

آج کا اخبار

اہم خبریں

04 جولائی ، 2018

اسلام آباد(نمائندہ جنگ) ملک میں آبادی میں اضافہ سے متعلق کیس کی سماعت کے دوران چیف جسٹس نے ریماکس دئیے ہم اس چکر میں پھنس گئے ہیں کہ کم بچے پیدا کرنا شاید دین کیخلاف ہے ، چین نے بھی بڑھتی آبادی کو قابو کیا ہے ، ملکی حالت ایسی نہیں کہ ایک گھر میں سات بچے ہوں لیکن عوام میں آگاہی بالکل نہ ہونے کے برابر ہے ، بڑھتی ہوئی آبادی ملک کیلئے ایٹم بم ہے،بوکرنے کا خاکہ بنا کردیا جائے ، صرف پالیسی بنانا کافی نہیں عملدرآمد کرنا چاہئےمنگل کو جسٹس میاں ثاقب نثار کی سربراہی میں جسٹس عمرعطا بندیال اور جسٹس اعجازا لاحسن پر مشتمل تین رکنی بینچ نے سماعت کی، عدالت عظمی نے و فاق اورصوبوں کوآبادی کنٹرول کرنے کیلئے موثر پالیسی سازی کی تجاویز طلب کرتے ہوئے ہدایت کی آبادی کو قابوکرنے کا خاکہ بنا کر فراہم کیا جائے، چیف جسٹس کا کہنا تھا آبادی بڑھنے کا بم پھٹ چکا ہے ، ایڈیشنل اٹارنی جنرل نیئر عباس رضوی کاکہنا تھا آبادی میں اضافہ کی شرح 2.4فیصد ہے، امن و امان کے مسائل ، دہشتگردی ، معاشرتی اور معاشی مسائل کی اصل وجہ بڑھتی آبادی ہے، آبادی میں اضافہ کے باعث ملک میں پانی اور اشیائے خوردونوش کے مسائل بھی پیدا ہورہے ہیں، جسٹس عمر عطابندیال نے کہاکہ غربت کے باعث لوگ بچے فروخت کر رہے ہیں ، حکومت کو سامنے آکرذمہ داری لینا ہو گی، سندھ کے سرکاری وکیل کا کہنا تھاآ بادی کنٹرول کیلئے پالیسی ہے لیکن قانون نہیں، جسٹس عمر عطابندیال نے کہااولاد میں مناسب وقفہ کے حوالے سے اسلامی احکامات بھی موجود ہیں لیکن آبادی کنٹرول کرنا حکومت کی ترجیح نہیں، آبادی کنٹرول کرنے کو کبھی اہمیت نہیں دی گئی، چیف جسٹس نے کہا صرف پالیسی بنانا کافی نہیں اس پر بھی عمل کرنا چاہئے، چیف سیکرٹری خیبر پختونخوا نے کہا دیہی علاقوں میں زچہ بچہ کی اموات کی شرح زیادہ ہے، کے پی میں آبادی بڑھنے کی شرح سب سے زیادہ ہے، چیف جسٹس نے کہا اللہ کے نام پر بنی اس ریاست کاچلنا ضرور ہے، خیبر پختونخوا کے سرکاری وکیل نے کہاصوبے کے پاپولیشن ویلفیئر ڈپارٹمنٹ کا بجٹ ایک ارب تیس کروڑ ہے جس کازیادہ تر حصہ تنخواہوں پر خرچ ہوتا ہے، حکام پاپولیشن ڈپارٹمنٹ پنجاب نے بتایا بڑھتی آبادی ا یک دم کم نہیں ہو سکتی ، 2010کے بعد سے غیر ملکی امداد بھی بند ہوگئی ہے میڈیا اور لیڈی ہیلتھ ورکرز کے ذریعے خاندانی منصوبہ بندی کے حوالے سے آگاہی پیدا کی جارہی ہے، چیف جسٹس نے کہا عدالت کو فلاحی مراکز کی کارکردگی سے بھی آگاہ کریں ، حکام پاپولیشن ڈپارٹمنٹ پنجاب کا کہنا تھا ایک سینٹر میں پانچ افراد ملازمت کرتے ہیں، شہری علاقوں میں 900 دیہی علاقوں میں 1200 ویلفیئر مراکز ہیں، چیف جسٹس نے حکام کو خبردار کیا اگر ڈیٹا غلط فراہم کیا گیاتو نتائج اچھے نہیں ہونگے، ویلفیئر مراکز کاغذی کارروائی کر رہے ہیں کیوں نہ خود جاکر سنٹرز کی کارکردگی کا جائزہ لے لوں،پنجاب حکومت ویلفیئر مراکز کے بجٹ سے آگاہ کرے ، تمام ویلفیئر مراکز کے بجٹ کا فرانزک آڈٹ کروالیں گے، چیف سیکرٹری خیبرپختونخوا نے کہاوزیراعظم کی سطح پر بڑھتی آبادی کی ذمہ داری لینا ہو گی ، پولیو مہم طرز پر کام ہو تو نتائج نکل سکتے ہیں ، چیف جسٹس نے کہا نئے پیدا ہونیوالوں کیلئے پانی اور خوراک دستیاب نہیں ، تعلیم، صحت اور صاف پانی بھی کسی کیلئے دستیاب نہیں،سکول اور کالج سطح پر آگاہی کیوں نہیں فراہم کی جاتی۔

تازہ ترین