نواز، مریم، صفدر کی اپیلیں آج جمع کرائی جائینگی

اسلام آباد(صباح نیوز) احتساب عدالت کے فیصلے کے خلاف سابق وزیراعظم نواز شریف انکی صاحبزادی مریم نواز اور داماد کیپٹن ریٹائرڈ صفدر کی اپیلیں آج ( پیر کو) اسلام آباد ہائیکورٹ میں دائر کئے جانے کا امکان ہے۔ایون فیلڈ ریفرنس میں عدالت سے سزا پانے والے تینوں مجرم اڈیالہ جیل میں قید ہیں جہاں جہاں گذشتہ روز نواز شریف سے والدہ اور بھائی شہباز شریف نے ملاقات کی۔ایک گھنٹے سے زائد وقت تک جاری رہنے والی ملاقات میں قانونی جنگ اور آئندہ کی سیاسی حکمت عملی پر بات چیت بھی ہوئی۔ امکان ظاہر کیا جارہا ہے کہ نواز شریف، مریم نواز اور کیپٹن(ر) صفدر آج (پیر کو) اسلام آباد ہائیکورٹ سے رجوع کرینگے اور انکی اپیلیں وہاں دائر کی جائیں گی۔ یاد رہے کہ احتساب عدالت نے 6 جولائی ایون فیلڈ ریفرنس کا فیصلہ سناتے ہوئے نواز شریف کو 11 سال، مریم نواز کو 7 اور کیپٹن (ر)صفدر کو ایک سال قید کی سزا سنائی تھی۔