’شرجیل میمن نے شراب سے انکار نہیں کیا تھا‘

04 ستمبر ، 2018

چیف جسٹس پاکستان جسٹس ثاقب نثار نے شرجیل میمن کے کمرے سے شراب کی برآمدگی سے متعلق ریمارکس دیتے ہوئے کہا کہ شرجیل میمن نے شراب سے انکار نہیں کیا تھا بلکہ کہا تھا کہ یہ بوتلیں ان کی نہیں، سندھ میں ہر بڑا آدمی بیمار ہوکر اسپتال پہنچ جاتا ہے۔

سپریم کورٹ میں غیر فعال ٹربیونلز کیس کی سماعت کے دوران شرجیل میمن کے کمرے سے شراب بر آمدگی کے معاملے پر ریمارکس دیتے ہوئے کہا کہ میں شرجیل میمن کےکمرے میں شہد کی کوئی بوتل دیکھ کر نہیں آیا اور ہمیں پتہ ہے کس کے قبضے میں بعد میں نمونے بدل دیئے گئے۔

چیف سیکریٹری سندھ نے پی پی رہنما کے خون ٹیسٹ کی رپورٹ کو مشکوک قرار دے دیا۔چیف سیکریٹری نے عدالت میں کہاکہ لگتا ہے رپورٹ میں ٹیمپرنگ ہوئی ہے، ہمارےپاس سب جیل اور اسپتال کی سی سی ٹی وی فوٹیج موجود ہے، معاملے کی تحقیقات کرکے رپورٹ دیں گے۔

کمال ہوگیا ہم غیر فعال عدالتیں اور ٹربیونلز فعال نہیں کرا سکے ، چیف جسٹس نے غیر فعال ٹربیونلز پر ریمارکس دیتے ہوئے کہا کہ کہا جاتا ہے عدلیہ کام نہیں کر رہی،خصوصی عدالتوں اور ٹربیونلز کو کسے فعال کرنا ہے؟

چیف سیکرٹریز نے کہا کہ سندھ ، کے پی میں تمام عدالتیں اور ٹربیونل فعال ہیں۔ ایڈیشنل ایڈووکیٹ جنرل نے عدالت کو بتایا کہ پنجاب میں 4 خصوصی عدالتوں میں ججز کی تقرری رہتی ہے۔

عدالت نے ڈرگ کورٹ کے جج اور ممبرز کی تقرری ختم کرنے کا حکم دیتے ہوئے ریمارتکس دیئے کہ جج کےساتھ دو ممبرز بٹھانے کی کیا ضرورت ہے؟ ڈرگ کورٹ میں ممبرز کی عدم دستیابی سے کیس متاثر ہوتے ہیں،پنجاب میں ڈرگ کورٹ کے جج کی تنخواہ ممبر سے کم ہے۔

ایڈیشنل ایڈووکیٹ جنرل نے کہا کہ ممبرز کی تنخواہیں چار لاکھ سے زیادہ ہیں۔

اس پر چیف جسٹس نے کہاکمال ہے، کھا رہے ہیں بیٹھ کر،قانون میں ترمیم کرکے ممبر کی تقرری ختم کریں جس کے بعد عدالت نے ہدایات جاری کرتے ہوئے کیس نمٹا دیا۔

تازہ ترین