راولپنڈی میں پیر سےتجاوزات کے خلاف آپریشن کا فیصلہ، سروے مکمل

میرا شہر

اسلام آباد

13 اکتوبر ، 2018

راولپنڈی(راحت منیر/اپنے رپورٹر سے)لاہور ہائی کورٹ راولپنڈی بنچ کے جسٹس عبادالرحمن لودھی کے نوٹس لینے کے بعد پیر سے راولپنڈی میں بھی تجاوزات کے خلاف آپریشن کا فیصلہ کرلیا گیا ۔ذرائع کے مطابق لاہور ،فیصل آباد،اسلام آباد سمیت دیگر شہریوں میں تجاوزات اور سرکاری زمینوں پر قبضوں کے خلاف سخت آپریشن کیا گیاجبکہ راولپنڈی میں اس طرح کی کارروائی نظر نہیں آرہی تھی۔ذرائع کے مطابق راولپنڈی شہرمیں ضمنی الیکشن کے باعث آپریشن کوقوت سے شروع نہیں کیا گیا تھا۔پیر سے سختی کے ساتھ کارروائی کا آغاز کیا جائے گا۔راولپنڈی میں تجاوزات اور قبضوں کی صورتحال انتہائی بدترین شکل اختیار کرچکی ہے۔جس کے باعث نکاسی اب کے راستوں کو بھی شدید خطرات لاحق ہوچکےہیں۔راولپنڈی کےسابق ڈی سی او ثاقب ظفر نے 4اپریل2013ء کو نالوں اور نالہ لئی پر غیرقانونی تعمیرات روکنے کیلئے باقاعدو تحریری احکامات جاری کئے جن کا آج تک کوئی نام ونشان نظر نہیں آیا۔اس کے بعد2فروری2018کوکمشنرراولپنڈی ڈویژن ندیم اسلم چوہدری نےدریائے سواں،نالہ لئی،نالہ کورنگ اور دریائے سل سمیت دیگر آبی گزرگاہوں کے کناروں پر غیر قانونی تعمیرات اور تجاوزات پر پابندی لگائی اور ہدایت کی تھی کہ قانونی تعمیرات کیلئے بھی محکمہ آبپاشی کا این او سی لینا لازمی ہوگا۔آبی گزرگاہوں کے رائٹ آف وے کی نشاندہی کیلئے سیکرٹری آبپاشی سے ٹیم تشکیل دینے کی سفارش کی گئی تھی۔راولپنڈی ڈویژن بھر کے ڈپٹی کمشنرز،ڈی جی آر ڈی اے،میئر میونسپل کارپوریشن راولپنڈی،ایڈمنسٹریٹر ضلع کونسل اور دیگر کو دریائوں،نالوں اور واٹر چیلنز کے کناروں پرغیر قانونی تعمیرات اور تجاوزات کے خلاف پنجاب فلڈ پلین ریگولیشنز ایکٹ2016کے تحت کارروائی کی ہدایت بھی کی گئی تھی۔لیکن نتیجہ وہی رہا جو 4اپریل2013ء کے احکامات کا تھا۔ فیڈرل فلڈ کمیشن ڈیڑھ سال سے دہائیاں دے رہا ہے کہ نالہ لئی اور اس سے ملحقہ نالوں پر سے تجاوزات کا خاتمہ کرکے رپورٹ دی جائے۔ 31مئی2017کےفیڈرل فلڈ کمیشن کےفیصلے کے بعد نوجون، 23جون، 10جولائی، یکم اگست،21اگست، 31اگست، 20ستمبر2017،15 دسمبر2017، 3جنوری2018،25 جنوری2018 اور نو فروری 2018 اور اس کے بعد بھی مراسلے بھجواچکا ہے۔لیکن یہ بھی حقیقت ہے کہ ہر سال نالہ لئی سمیت شہر بھر کے نالوں پر تجاوزات گزشتہ برس سے زیادہ ہوجاتی ہیں۔راولپنڈی کے شہریوں کی خواہش ہے کہ موجودہ حکومت نے اقتدار میں آکر تجاوزات اور قبضوں کےخلاف جس طرح دوسرے شہروں میں بھرپور آپریشن کیا ہے۔اسی طرح راولپنڈی میں بھی آپریشن کرکے راستے،فٹ پاتھ،نالے اور بازار رواگزار کرائے جائیں تاکہ شہری آمدو رفت میں جس اذیت کا سامنا کرتے ہیں اس سے چھٹکارا پاسکیں۔ دریں اثناءراولپنڈی ضلع بھر باالخصوص میونسپل کارپوریشن راولپنڈی کی حدود میں میں تجاوزات کے خلاف آپریشن کے دوران کوئی رعایت نہیں کی جائے گی۔ متعلقہ اداروں نے سروے مکمل کرلیا ہے،آپریشن سوموار سے شروع ہوگا،اس ضمن میں راجہ بازار،سٹی صدر روڈ،گنج منڈی روڈ،کشمیری بازار،لیاقت روڈ،باڑہ مارکیٹ،بازار تلواڑاں،موچی بازار،اقبال روڈ،جامعہ مسجد روڈ،بانسانوالہ چوک ٹائر بازار،بنی چوک،جامعہ مسجد روڈ،سرکلر روڈ،کوہاٹی بازار،سید پور روڈ،کمرشل مارکیٹ،مری روڈ،صادق آباد،شمس آباد،بند کھنہ روڈ،کری روڈ،سروس روڈ،ڈھوک الٰہی بخش،ڈھوک کھبہ،امر پورہ،چاہ سلطان،سرسیدروڈ سمیت مختلف بازاروں،ذیلی مارکیٹوں اورملحقہ چوکوں میں زیادہ ترعارضی وپختہ تجاوزات کا صفایا کیا جائیگا ۔ ضلعی انتظامیہ راولپنڈی کے ذرائع نے بتایا کہ تجاوزات کے مکمل خاتمے تک مہم جاری رہے گی اور دوبارہ تجاوزات قائم کرنے والوں کیخلاف سخت کارروائی ہوگی۔انہوں نے بتایا کہ تجاوزات کے خاتمے کیلئے آپریشن ٹیمیں تشکیل دی جارہی ہیں جس میں محنتی اور ایماندار افسران کو شامل کیا جارہا ہے،پہلے سے یا عرصہ دراز سے متعلقہ علاقوں میں تعینات شعبہ تجاوزات کے انسپکٹروں کو آپریشن ٹیم میں شامل نہیں کیا جائیگا،تجاوزات کے خاتمے کے بعد نگران ٹیموں کی طرف سے بازاروں کو روزانہ وقفہ وقفہ سے چیک بھی کیا جائیگا تاکہ دوبارہ فٹ پاتھوں اور سڑکوں پر تجاوزات تقسیم قائم کرنے کی سختی سے حوصلہ شکنی کی جاسکے۔

تازہ ترین