درآمد و برآمدمیں سہولتیں

17 جنوری ، 2019

زرمبادلہ کے ذخائر میں کمی اس وقت پاکستان کا ایک بڑا مسئلہ ہے۔ حکومت اس پر قابو پانے کیلئے درآمدی و برآمدی پالیسی کا مسلسل جائزہ لے رہی ہے۔ اقتصادی رابطہ کمیٹی نے گزشتہ روز وزیر خزانہ اسد عمر کی زیر صدارت اس حوالے سے کئی اہم فیصلے کئے ہیں جو وفاقی کابینہ کی منظوری کے بعد نافذ العمل ہوں گے۔ ایک فیصلہ یہ ہے کہ ذاتی اور گفٹ اسکیم کے تحت امپورٹڈ، نئی اور پرانی گاڑیوں پر ڈیوٹی اور ٹیکس کی ادائیگی غیر ملکی کرنسی میں کرنا ہو گی۔ یہ ادائیگیاں بیرونِ ملک مقیم پاکستانی یا انکے مقامی رشتہ دار کریں گے اور انہیں ان ادائیگیوں کا بینک سرٹیفکیٹ بھی فراہم کرنا ہو گا۔ اس طریقِ کار سے گاڑیوں کی درآمد کا غلط استعمال روکنے میں مدد ملے گی۔ کاروبار آسان بنانے کی یہ تجویز منظور کرکے کمیٹی نے گاڑیوں کی درآمد میں حائل ایک مشکل دور کر دی۔ کپاس کی درآمد پر کسٹم ڈیوٹی اور سیلز ٹیکس کی چھوٹ کی منظوری بھی دیدی گئی، اس استثنا کو آئندہ مالی سال میں بھی توسیع دی جائے گی۔ برآمدی اور درآمدی پالیسیوں کے آرڈر2016 میں ترامیم کی منظوری دی گئی ہے جس سے درآمد و برآمد کنندگان کو کاروبار میں سہولتیں حاصل ہوں گی اور غیر ملکی زرمبادلہ لانے میں مدد ملے گی۔ اسٹیٹ بینک اور ایف بی آر کو اس حوالے سے طریقِ کار وضع کرنے کی ہدایت کر دی گئی ہے۔ پاکستان اس وقت تجارتی خسارے کے جس مشکل دور سے گزر رہا ہے اس سے نبرد آزما ہونے کیلئے اس طرح کے اقدامات وقت کا ناگزیر تقاضا ہیں۔ درآمدات میں بے محابہ اضافہ اور برآمدات میں کمی کے باعث یہ خسارہ مسلسل بڑھتا جا رہا ہے۔ حکومت نے اس حوالے سے کچھ ضروری اقدامات کئے ہیں جس کے اچھے نتائج برآمد ہونے کی توقع ہے مگر درآمدی اور برآمدی بل میں تفاوت اتنا زیادہ ہے کہ اسے دور کرنے میں کافی وقت لگے گا۔ اس مقصد کیلئے پرتعیش اشیاء کی درآمد کم اور برآمد بڑھانے کیلئے برآمد کنندگان کو فراخدلانہ مراعات اور ترغیبات دینا پڑیں گی۔ توقع ہے کہ اقتصادی رابطہ کمیٹی اس حوالے سے مزید امکانات کا جائزہ لے گی تاکہ ملکی معیشت اپنے پائوں پر کھڑی ہو سکے۔

اداریہ پر ایس ایم ایس اور واٹس ایپ رائے دیں00923004647998

تازہ ترین