ملزم نہ ملنے پر پولیس اہلکار بہن کا جہیز لے گئے

پنجاب پولیس کا ایک انوکھا اقدام سامنے آیا ہے، چنیوٹ میں مطلوب ملزم نہ ملنے پر پولیس اہلکار اس کی بہن کے جہیز کا فرنیچر اٹھا کر لے گئے۔

ملزم حسن کے خلاف کھیل کے دوران جھگڑے پر مخالف لڑکے کے والدین نے تھانے میں شکایت درج کرائی تھی، پولیس نے ملزم کی عدم گرفتاری پر بہن کے جہیز کا فرنیچر قبضے میں لے کر تھانے منتقل کردیا۔

چنیوٹ کے محلہ نور والا میں حسن اور ساجد کے درمیان ابلے ہوئے انڈوں پر جھگڑا ہوا تھا۔ ساجد کے والدین نے تھانہ میں حسن کیخلاف درخواست دی تھی۔

حسن کی والدہ نے الزام لگایا کہ پولیس نے بیٹے کی گرفتاری کیلئے چھاپہ مارا تھا،حسن گھر پر نہیں ملا تو پولیس والے میری بیٹی کے جہیز کا سامان اٹھا کر لے گئی۔ بیٹی کی اگلے ہفتے شادی ہے۔

پولیس کا موقف ہے کہ جہیز کا فرنیچر مالِ مقدمہ کے طور پر اٹھایا ہے، ملزم حسن تھانے میں پیش ہوجائے گا تو سامان واپس کردیں گے۔