’’ملک گالیاں دینے سے نہیں چلتے‘‘

مسلم لیگ نون کے صدر اور قومی اسمبلی میں قائد حزب اختلاف میاں شہباز شریف کہتے ہیں کہ وقت ثابت کر رہا ہے کہ نیازی صاحب لوگوں کو صرف گالیاں دے سکتے ہیں، ملک گالیاں دینے سے نہیں چلتے۔

ایک بیان میں شہباز شریف نے گیس کی قیمتوں میں مجوزہ 45 فیصد اضافے پر اظہار مذمت کرتے ہوئے کہا کہ گیس کی قیمتوں میں مجوزہ اضافہ مسترد کرتے ہیں، یہ اضافہ فوری واپس لیا جائے۔

انہوں نے کہا کہ گیس، بجلی، پٹرول، اشیائے ضروریہ کی قیمتوں میں ہوشربا اضافہ کیا گیا ہے، عوام کیسے زندہ رہیں گے؟ کاروبار کیسے ہوگا؟

شہبازشریف نے مطالبہ کیا کہ مہنگائی اور معاشی صورت حال دیکھتے ہوئے کم از کم تنخواہ 30 ہزار روپے کی جائے، تنخواہ دار طبقے کو تنخواہ میں کم از کم 10 ہزار روپے کا فوری ریلیف دیا جائے۔

انہوں نے کہا کہ نیازی حکومت ملکی امور چلانے میں مکمل ناکام ہو چکی ہے، ملکی معیشت اسی طرح ڈوبتی رہی تو قومی سلامتی کے لیے سنگین خطرہ ہے۔

شہباز شریف کا مزید کہنا ہے کہ نالائق اور نااہل ٹولہ ملک و قوم کے مفاد پر تجربات کے بجائے گھر چلا جائے، قوم سب سے بڑی تبدیلی یہ چاہتی ہے کہ نااہل اور نالائق ٹولہ تبدیل ہو جائے۔

قومی اسمبلی میں اپوزیشن لیڈر نے یہ بھی کہا کہ نیازی صاحب کی نالائقی نے ملکی معیشت کو ایشیاء کی بدترین معیشت بنا دیا ہے۔