فرمان الہی
نماز کے اوقات
آئی سی سی کرکٹ ورلڈ کپ 2019ء میں اپنے دوسرے میچ میں پاکستان نے انگلینڈ کو جیت کے لئے 349 رنز کا ہدف دیا ہے، محمد حفیظ، بابر اعظم اور سرفراز احمد نے نصف سنچریاں اسکور کیں۔
ناٹنگھم میں کھیلے جارہے میچ میں پاکستان اوپنرز نے ٹیم کو ایک اچھا آغاز فراہم کیا اور 82 کے مجموعی اسکور پر اس کی پہلی وکٹ گری۔
انگلینڈ کیخلاف پاکستانی اوپنرز امام الحق اور فخر زمان نے اننگ کا ذمہ دارانہ آغاز کیا تاہم فخر زمان 36 رنز بنا کر معین علی گیند پر اسٹمپ آؤٹ ہوگئے۔
اگلے آؤٹ ہونے والے بیٹسمین امام الحق تھے، جو معین علی کی گیند پر ووکس کے ہاتھوں کیچ آؤٹ ہوئے، انہوں نے 58 گیندوں پر 44 رنز بنائے۔
بابر اعظم اور محمد حفیظ نے تیسری وکٹ کے لئے قیمتی 88 رنز جوڑے اور ٹیم کا اسکور 199 تک پہنچایا، بابر اعظم بھی معین علی کی گیند پر ووکس کو کیچ دے بیٹھے، وہ 63 رنز بناکر آؤٹ ہوئے۔
محمد حفیظ اور کپتان سرفراز احمد نے مل کر 80 رنز بنائے، ٹیم کا اسکور 279 ہوا تو محمد حفیظ 62 گیندوں پر 2 چھکوں اور 8 چوکوں کی مدد سے 84 رنز بناکر ووڈ کی گیند پر ووکس کے ہاتھوں کیچ آؤٹ ہوگئے۔
آصف علی صرف 14 رنز بناسکے، وہ ووڈ کی گیند پر بیرسٹو کے ہاتھوں کیچ آؤٹ ہوئے۔
کپتان سرفراز احمد نے 44 گیندوں کا سامنا کرتے ہوئے 55 رنز بنائے۔
وہاب ریاض 4 اور شعیب ملک 8 رنز بناسکے،جبکہ حسن علی اور شاداب خان 10، 10 رنز کے ساتھ ناٹ آؤٹ رہے۔
اس طرح پاکستان ٹیم مقررہ پچاس اوورز میں 8 وکٹوں کے نقصان پر 348 رنز بنانے میں کامیاب رہی۔
انگلینڈ کی جانب سے معین علی اور ووکس نے تین، تین جبکہ ووڈ نے دو وکٹیں حاصل کیں۔
انگلینڈ کی ٹاس جیت کر فیلڈنگ
اس سے قبل ورلڈ کپ کرکٹ کے چھٹے میچ میں انگلینڈ نے پاکستان کیخلاف ٹاس جیت کر پہلے فیلڈنگ کا فیصلہ کیا۔
ٹاس ہارنے کے بعد سرفراز کا کہنا تھا کہ ہم بھی ٹاس جیت کر پہلے بولنگ کرتے، یہ ایک اچھی بیٹنگ وکٹ دکھائی دے رہی ہے، بڑا اسکور کریں گے اور اس کا دفاع بھی کریں گے۔
انہوں نے بتایا کہ میچ میں قومی ٹیم میں 2 تبدیلیاں کی گئی ہیں، حارث سہیل اور عماد وسیم کی جگہ شعیب ملک اور آصف علی کو شامل کیا گیا ہے۔
انگلش کپتان مورگن نے بتایا کہ ٹیم میں ایک تبدیلی کی گئی، لیام پلنکٹ کی جگہ مارک ووڈ کو 11 رکنی ٹیم کا حصہ بنایا گیا ہے۔
ایونٹ میں انگلینڈ اپنا پہلا میچ جنوبی افریقا کے خلاف جیت چکا ہے جبکہ پاکستان ٹیم اپنی پہلی فتح کے انتظار میں ہے۔
میچ سے قبل انگلینڈ کے کپتان مورگن ، جو روٹ اور ٹیم کے کوچ نے پاکستان کو خطرناک ٹیم قرار دیا ہے، ان کا کہنا ہے کہ یہ ٹیم باؤنس بیک کر سکتی ہے۔
دوسری جانب پاکستان کے بولنگ کوچ اظہر محمود کا کہنا تھا کہ انگلینڈ کے خلاف میچ میں ہمیں 10 اچھی گیندیں کرانی ہیں، عامر کا فارم میں آنا خوش آئند ہے، وہ باصلاحیت بولر ہے جبکہ حسن علی کا گراف نیچے آیا ہے لیکن وہ آؤٹ کر رہا ہے۔
