بھارتی دھمکیوں سے نمٹنے کی پلاننگ ہم پر چھوڑ دیں،جنرل آصف غفور

ڈی جی آئی ایس پی آر میجر جنرل آصف غفور نے کہا ہے کہ بھارتی دھمکیوں سے نمٹنے کی پلاننگ ہم پر چھوڑ دیں۔

دفتر خارجہ میں غیر رسمی گفتگو میں میجر جنرل آصف غفور نے کہا کہ جہاں ضرورت ہوگی، وہاں رسپانس دیا جائے گا، دھمکیوں کو ہم کیسے دیکھیں گے، اس کی پلاننگ ہم چھوڑ دیں۔

انہوں نے کہا کہ بھارت آزاد کشمیر پر قبضے کا خواب نہ دیکھے، اہل وطن کو یقین دلاتے ہیں پاک فوج آپ کو مایوس نہیں کرے گی۔

ڈی جی آئی ایس پی آر نے مزید کہا کہ بھارت یہی چاہ رہا ہے کہ موجودہ حالات میں کچھ ہو اور توجہ کشمیر سے ہٹ جائے، سرحدی خلاف ورزی پر بھارت کو سرپرائز دیں گے۔

ان کا کہنا تھا کہ مقبوضہ کشمیر پر پابندیاں اٹھتے ہی کشمیریوں کا رد عمل سامنے آجائے گا، نائن الیون کے بعد سے بھارت تحریک آزادی کشمیر کو دہشت گردی سے جوڑنے کی کوشش کر رہا ہے۔

آصف غفور نے کہا کہ تمام دھمکیوں پر صورتحال کو دیکھنے کی ذمہ داری مسلح افواج کی ہے، ملکی دفاع کے لیے جو ضروری ہوگا وہ کیا جائے گا، ہم ہر حد تک جائیں گے۔