آپ آف لائن ہیں
جنگ ای پیپر
بدھ23؍ صفرالمظفّر 1441ھ 23؍اکتوبر 2019ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
تازہ ترین
آج کا اخبار
کالمز

حضرت علیؓ دنیائے اسلام کی وہ عظیم ہستی ہیں جن کے ہر قول بلکہ ہر لفظ میں دانش پنہاں ہے۔ ان کی ذاتِ مبارک علم و عرفان کا ایک ایسا چشمہ ہے جس سے دنیا کا ہر انسان مستفید ہو سکتا ہے۔ یوں تو اکثر مواقع پر ان کے اقوال ہماری رہنمائی کرتے ہیں بلکہ فکر کے نئے در وا کرتے ہیں مگر ان کا ایک قول ہم روزمرہ زندگی میں بار بار سنتے ہیں کہ اگر کسی پر احسان کرو تو اُس کے شر سے بچو۔ تو کیا حضرت علیؓ جیسی صاحبِ فراست ہستی لوگوں کو ایک دوسرے کی مدد سے دور کر سکتی ہے کیوں کہ کائنات میں تمام انسان احسان کی رسی میں بندھے ہوئے ہیں، یہ اس مقولے کی غلط تفہیم ہے ورنہ لوگ احسان کرنا بند کر دیں تو معاشرہ کی کشاد اور ہم آہنگی یوں ختم ہو جائے کہ وہ تنہا انسانوں کا زندہ قبرستان محسوس ہونے لگے۔ سماجی جڑت ایک دوسرے کے کام آنے سے پیدا ہوتی ہے حتیٰ کہ محبت اور احساس کے رشتےاسی سے جنم لیتے ہیں۔

ارسطو نے انسان کو سماجی حیوان کہا ہے۔ سماج ایک ایسی کڑی ہے جس کے بغیر اس کا گزارا نہیں۔ دنیا جہان کی نعمتیں اور آسائشیں بے وقعت ہو جائیں اگر فرد کو بات کرنے، صلاحیتوں کا اظہار کرنے اور رابطے کے لئے اپنے جیسے انسان میسر نہ ہوں۔ شاعر بھی چند لمحوں کی یاسیت دور ہونے کے بعد حقیقی دنیا سے جڑت کو ہی اہم جاننے لگتا ہے۔ روحانیت اور ظاہری علوم پر سند کی وجہ سے حضور ﷺ نے انہیں علم کی اس عمارت کا دروازہ کہا جس کے وہ خود مکین و مختار ہیں۔

دراصل سماج اِنسانوں کے رابطے اور اخوّت کا ایسا ادارہ ہے جہاں فرد صاحبِ حیثیت ہوتے ہوئے بھی خود کفیل نہیں۔ مختلف ضرورتوں اور کاموں کے لئے اُسے دوسروں کی رہنمائی، مدد اور خدمت کی ضرورت پڑتی ہے۔ ہر انسان کی زندگی میں قدرت کی طرف سے کچھ وسیلے بنائے جاتے ہیں جو اُسے منزل تک پہنچنے میں مدد دیتے ہیں۔ کہا جاتا ہے کہ انسان کی اسّی فیصد قسمت اس کے جینز میں رکھ دی جاتی ہے جب کہ اس کا اختیار اور صوابدید صرف بیس فیصد تک ہے کہ وہ موقع و محل کے مطابق ردِّعمل کا اظہار کرے اور درست وقت پر درست فیصلہ کرے تاہم کبھی کبھی یہ بیس فیصد اسی فیصد پر حاوی ہو جاتا ہے کیوں کہ طلبگار اس دروازے پر دستک ہی نہیں دیتا جس کے اندر اس کے خوابوں کی تعبیر منتظر ہوتی ہے۔ کبھی فیصلہ سازی کافقدان اور کبھی خوف کے باعث عمل سے اجتناب ناکامی کا سبب بنتا ہے۔

ہر انسان کی زندگی میں احسان کے کئی مقام آتے ہیں۔ یہ بھی معاشرے کو مربوط کرنے کی ایک شکل ہے۔ احسان کرنے والے کا یہ افتخار ہے کہ وہ احسان کر کے بھول جائے مگر احسان لینے والے کی یہ پہچان کہ ہمیشہ احسان مندی کے جذبات سے لبریز رہے۔ حضرت علیؓکے قول کی تشریح کرتے ہوئے یہ بات واضح ہوتی ہے کہ ان کا اشارہ کم ظرف انسان کی جانب ہے جس کے دامن میں زیادہ کچھ سمیٹنے کی جگہ نہیں ہوتی، اس کا احساسِ کمتری سرکشی کا روپ دھار کر اُس ہستی کے مقابل لے آتا ہے کہ وہ احسان کرنے والے کو خود سے برتر سمجھ کر اُس سے مخاصمت پر تُل جاتا ہے۔ یہی وہ مقام ہے جب اس کا جوہرِ انسانیت بکھر جاتا ہے، انتقام اور نفرت کی آگ اسے جلا کر راکھ کرنے لگتی ہے اور رفتہ رفتہ رحمتِ خداوندی اس سے دُور ہونے لگتی ہے۔ مگر اس دوران وہ خبثِ باطن سے نکلنے والی شر کی آگ سے اپنے محسن کو جلانے کی کوشش کرتا ہے اور کچھ نقصان بھی پہنچا دیتا ہے۔ اسی لئے کہا گیا کہ اگر کم ظرف پر احسان کرو تو اس کے شر سے بچو۔ احسان کرنے والا اپنی فطرت سے مجبور ہوتا ہے۔ وہ خیر اور نیکی کے رستے پر چلتا ہوا اپنی فطرتِ سلیم کے تحت ہمیشہ دوسروں کی مدد کرنے پر آمادہ ہوتا ہے۔ اس کے باطن میں جگمگاتے خیر کے چشمے اسے کسی کو نقصان پہنچانے کی اجازت ہی نہیں دیتے۔ قدرت نے اس کی رسّی مضبوطی سے تھامی ہوتی ہے۔ وہ اپنے مرکز سے دور نہیں جا سکتا۔ وہ مرکز جو نُور کا گہوارہ ہے ایسے میں اگر ذرا سا تکبر اُس کے دل میں آ جائے تو رسّی کھینچ کر زور کا جھٹکا دیا جاتا ہے۔ مگر دوسری طرف وہ لوگ ہوتے ہیں جو اپنی نفرت کی آگ میں جل بجھ کر ذلت کی اس سطح پر پہنچ چکے ہوتے ہیں جہاں دلوں پر مہریں لگ جاتی ہیں۔ دراصل جب کوئی انسان اپنے باطن کی آواز پر کان نہیں دھرتا اور غلط رُخ کر لیتا ہے تو پھر منطقی نتیجہ بھٹکنے اور نقصان اٹھانے کے سوا کچھ نہیں نکلتا۔

حضرت علیؓ کے فرمان کے مطابق نیک فطرت لوگوں کو خبر ہوتی ہے کہ ظرف والا اور کم ظرف کون ہے اس لئے جب وہ ظرف والوں کی رہنمائی کرتے ہیں تو وہ انہیں احساسِ تشکر سے نہال کرتے ہیں لیکن جب وہ کم ظرف سے اچھا سلوک کرتے ہیں تو جواباً کسی حسنِ سلوک کے طلبگار ہوتے ہیں جنابِ علی ؓ کے قولِ فیصل کی رو سے ایسے لوگوں سے محتاط رہنے کی تلقین کی گئی ہے۔

ہزاروں کروڑوں سال سے زندگی کا سفر جاری ہے جس میں ایک چھوٹے سے وقفے کے لئے ہم اسٹیج پر آتے ہیں۔ اِس وقت کو اچھی طرح گزارنا ہمارے اپنے ہاتھ میں ہے ورنہ فراعین بھی چلے جاتے ہیں اور سکندر بھی مگر اچھے اعمال اور دانش بھرے لفظ زندہ رہتے ہیں، خوشبو کی طرح اُڑتے پھرتے ہر طرف مہک رچاتے ماحول کو خوشگوار بناتے۔ آئیے زندگی کی ہماہمی سے وقت چرا کر ان بھلے لوگوں کے بارے میں بھی سوچیں جن کے احسان کے ہم مقروض ہیں۔ اگر ہم نے کسی پر احسان کیا ہے تو مت بھولیں کہ اس زندگی میں بہت سے لوگوں نے ہم پر بھی احسان کئے ہوں گے۔ سو ذرا وقت نکال کر ان لوگوں کا شکریہ ادا کرتے چلیں جنہوں نے کسی مشکل وقت میں ہماری داد رسی کی۔ اُن کے حق میں دُعا کر کے اپنا آپ بلند کر لیں۔