• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

چینی کمپنی نے پلانٹ بند کر دیا، ملک میں ایل پی جی کے شدید بحران کا خدشہ

آج کا اخبار
اہم خبریں
05 اکتوبر ، 2019
اسلام آباد (خالد مصطفیٰ) ایک ایسے وقت جب موسم سرما کی عنقریب آمد متوقع ہے۔ ایل پی جی کا سنگین بحران پیدا ہونے والا ہے۔ چینی کمپنی ایچ بی پی نے این اے پی ایس ایچ پی اے گیس پروسیسنگ اینڈ ایل پی جی ریکوری پلانٹ بند کر دیا ہے کیونکہ او جی ڈی سی ایل کے چینی کمپنی سے تنازعات ناقابل حل صورت اختیار کرگئے ہیں۔ او جی ڈی سی ایل کے ترجمان احمد حیات لک نے پلانٹ بند ہونے کی تصدیق کر دی ہے اور کہا کہ کنٹریکٹر نے غیرقانونی طورپر ڈسٹری بیوشن کنٹرول سسٹم کے ہیر پھیر کے ذریعہ پاس ورڈز تبدیل کئے اور سوفٹ ویئر میں رد و بدل کیا۔ جس سے 375 میٹرک ٹن ایل پی جی یومیہ کی فراہمی رُک گئی۔ او جی ڈی سی ایل کو فروری 2018ء سے ایل پی جی، کنڈنسیٹ، پروسیسڈ گیس اور این جی ایل ایچ بی پی کو پی اے سی کے اجراء اور آزمائش کے بغیر حاصل ہو رہی تھی جو کنٹریکٹ کی خلاف ورزی تھی۔ ایچ بی پی، او جی ڈی سی ایل سے 10 کروڑ ڈالرز کی ادائیگی اور پرفارمنس ٹیسٹ اور پی اے سی کے لئے 31 اکتوبر 2019ء تک کی توسیع چاہتی ہے۔ او جی ڈی سی ایل کا مؤقف ہے کہ چینی کنٹریکٹر پلانٹ کا آپریشن بند نہیں کر سکتا۔ جس میں 148 ملین ڈالرز کی سرمایہ کاری کی گئی ہے۔ او جی ڈی سی ایل نے چینی کنٹریکٹر کو 80 فیصد ادائیگی کر دی ہے اور باقی 20 فیصد کی ادائیگی پرفارمنس ٹیسٹ پر ہوگی۔ ترجمان نے تنازع پر مزید کچھ کہنے سے معذرت کی اور کہا انہیں یہ باتیں عام کرنے کا اختیار نہیں ہے، او جی ڈی سی ایل اور چینی کمپنی کے درمیان تنازع اس وقت سامنے آیا جب وزیراعظم عمران خان اور آرمی چیف جنرل قمرجاوید باجوہ غیرملکی سرمایہ کاری کیلئے سرتوڑ کوششیں کر رہے ہیں۔ ملک میں مقامی کاروبار کیلئے بھی ماحول کو سازگار بنانے کے کوشاں ہیں۔ لیکن تیل کی تلاش اور پیداوار غیرملکی کمپنیوں سے ناروا سلوک اختیار کیا گیا ہے۔ جس کا اندازہ او جی ڈی سی ایل اور چینی کمپنی کے درمیان محاذ آرائی سے لگایا جا سکتا ہے۔ صورتحال اس قدر بگڑ گئی کہ 30 ستمبر 2019ء کے بعد سے پلانٹ سے آپریشن جاری رکھنا ممکن نہیں رہا۔ جہاں سے ایل پی جی پیداوار 300 میٹرک ٹن یومیہ تھی۔ او جی ڈی سی ایل نے بحران حل کرنے کے لئے کوئی معقول اقدام کے بجائے بی ایچ پی کو آپریشنز فوری شروع کرنے کے لئے کہا ورنہ پلانٹ کی بندش پر 15 لاکھ ڈالرز جرمانے کا سامنا کرنا پڑے گا۔انتظامیہ نے پلانٹ بحال نہ ہونے کی صورت میں چینی کمپنی کو بلیک لسٹ کرنے کی دھمکی دی۔ تاہم او جی ڈی سی ایل نے اس کی تردید کی۔ ترجمان کے مطابق متعلقہ کمیٹی نے چینی کمپنی کو بلیک لسٹ کیا۔ دریں اثناء چینی کمپنی ایچ بی پی نے ڈیڑھ سال کی مراسلت کے بعد او جی ڈی سی ایل کو 7روز میں کچھ اقدامات کے لئے قانونی نوٹس جاری کیا ہے۔ فوری طور پر 10 کروڑ ڈالرز کی ادائیگی کا مطالبہ کیا ہے۔ او جی ڈی سی ایل کو فروری 2018ء سے پلانٹ سے ایل پی جی کی فروخت سے 80 کروڑ ڈالرز آمدنی ہوئی لیکن پروجیکٹ کی رسمی تکمیل اور 10 کروڑ ڈالرز کے واجبات کی چینی کمپنی کو ادائیگی کے بغیر پیداوار سمجھوتے کی واضح خلاف ورزی ہے۔
تازہ ترین