خالد جاوید خان نئے اٹارنی جنرل آف پاکستان تعینات

وفاقی حکومت نے خالد جاوید خان کو انور منصور کی جگہ نیا اٹارنی جنرل آف پاکستان تعینات کر دیا ہے۔

صدر مملکت کی منظوری سے وزارت قانون و انصاف نے خالد جاوید خان کو بطور اٹارنی جنرل تعینات کرنے کا باضابطہ نوٹیفیکیشن جاری کر دیا ہے ۔

وزارت قانون کی طرف سے جاری نوٹیفیکیشن کے مطابق صدر مملکت نے آئین پاکستان 1973ءکی شق 100کی ذیلی شق 1کے تحت حاصل اختیارات کو بروئے کار لاتے ہوئے خالد جاوید خان کو اٹارنی جنرل پاکستان تعینات کیا ہے ۔ ان کا عہدہ وفاقی وزیر کے برابر ہوگا۔

ذرائع کے مطابق نئے اٹارنی جنرل خالد جاوید خان پیر کے روز جسٹس قاضی فائز عیسیٰ کی جانب سے دائر درخواستوں پر حکومتی مؤقف پیش کریں گے۔

واضح رہے کہ دو روز قبل وفاقی حکومت کے مطالبے پر اٹارنی جنرل انور منصور خان نے اپنے عہدے سے استعفیٰ دے دیا تھا۔

انور منصور خان نے اپنے استعفے میں مؤقف اختیار کیا ہے کہ پاکستان بار کونسل نے میرے استعفے کا مطالبہ کیا تھا۔

انور منصور نےجسٹس فائز ریفرنس میں عدلیہ مخالف دلائل دیئے، علی ظفر

بیرسٹر علی ظفر نے جیو نیوز کے مارننگ شو ’ جیو پاکستان‘ میں گفتگو کے دوران انور منصور خان کے اٹارنی جنرل پاکستان کے عہدے سے استعفیٰ دینے سے متعلق بات کرتے ہوئے کہا کہ انور منصور نے جسٹس فائز عیسیٰ ریفرنس کے خلاف کیس میں عدلیہ مخالف دلائل دیئے تھے

انہوں نے مزید کہا ہے کہ جس بار کا میں چیئرمین تھا افسوس اسی نے مجھ سے استعفیٰ مانگا، جب اپنی برادری استعفیٰ مانگے تو دینا پڑتا ہے۔