لوگوں میں کورونا فوبیا کی بیماری جنم لے رہی ہے، ڈاکٹر ایم ایچ مبشر

عالمی وبا کورونا وائرس کے پیش نظر ماہرین نفسیات کا کہنا ہے کہ کورونا وائرس کے سبب لوگوں میں نفسیاتی مسائل پیدا ہو رہے ہیں، لوگوں میں کورونا فوبیا کی بیماری جنم لے رہی ہے۔

کورونا وائرس سے پیدا ہونے والے نفسیاتی مسائل سے متعلق ماہرین نفسیات  پروفیسر ڈاکٹر رضوان تاج اور پروفیسر ڈاکٹر ایم ایچ مبشر نے جیو نیوز کے پروگرام جیو پارلیمنٹ میں گفتگو کے دوران کہا ہے کہ کورونا کے خوف سے نیند، کھانے پینے کے مسائل سمیت ڈپریشن بڑھ رہا ہے، کورونا کے باعث لوگوں کی زندگی محدود اور تبدیل ہوچکی ہے۔

پروفیسر ڈاکٹر رضوان تاج نے کہا کہ انسان کی قوت برداشت کی ایک حد ہوتی ہے، لوگوں کو غصہ زیادہ آرہا ہے اور چڑچڑا پن پیدا ہورہا ہے جبکہ غصہ زیادہ آنے سے تعلقات متاثر ہوتے ہیں، ذہنی صحت اچھی ہوگی تو کورونا پر قابو پالیں گے۔

انہوں نے چرچڑا پن دور کرنے کے لیے تجویز دیتے ہوئے کہا کہ دکھ درد بانٹیں گے تو ذہنی مسائل پیدا نہیں ہوں گے، ایک دوسرے سے رابطہ رکھنے سے ڈپریشن کم ہوتا ہے، لوگوں کو موجودہ حالات کے مطابق خود کو ڈھالنا ہوگا۔

ڈاکٹر رضوان تاج نے کہا کہ لوگوں کو اپنے غصے پر کنٹرول کرنے کی اشد ضرورت ہے۔

پروفیسر ڈاکٹر رضوان تاج نے مزید کہا کہ لوگوں میں مستقبل کے بارے میں غیر یقینی پیدا ہوچکی ہے، محدود ماحول میں رہنے سے گھروں میں تنازعات بڑھ جاتے ہیں۔

پروگرام کے دوران پروفیسر ڈاکٹر ایم ایچ مبشر کا کہنا تھا کہ لوگ ایک دوسرے سے منقطع ہوں تو قوت مدافعت پر اثر پڑتا ہے، لوگوں کی ذہنی قوت مدافعت بھی بہت کم ہوگئی ہے، سماجی فاصلہ مغرب کی اصطلاح ہے جس کی نقالی سے مسائل بڑھیں گے۔

پروفیسر ایم ایچ مبشر کا مزید کہنا تھا کہ تنہائی سے ذہنی کوفتیں بڑھ رہی ہیں جس کے سبب گھروں میں بند ہونے سے لوگ اندر ہی اندر گھٹ رہے ہیں ٹیکنالوجی کے ذریعے روابط قائم رکھیں۔