شہری آبادی کو نشانہ بنانا بھارتی فوج کا بزدلانہ فعل ہے: عثمان بزدار

وزیراعلیٰ پنجاب سردار عثمان بزدار نے  لائن آف کنٹرول پر شہری آبادی پر بھارتی فوج کی بلااشتعال فائرنگ و گولہ باری کے واقعات کی شدید مذمت کرتے ہوئے کہا کہ شہری آبادی کو نشانہ بنانا بھارتی فوج کا انتہائی بزدلانہ اور قابل مذمت فعل ہے۔

عثمان بزدار نے ڈھنڈنیال سیکٹر پر 2 سالہ بچے محمد حسیب کی شہادت پر دکھ اور افسوس کا اظہار کرتے ہوئے شہید بچے کے لواحقین سے دلی ہمدردی و اظہار تعزیت کیا۔

LoC پر بھارتی فوج کی بلااشتعال فائرنگ،2سال کا بچہ شہید، 4شہری زخمی

پاک فوج کے شعبہ تعلقات عامہ (آئی ایس پی آر) کا کہنا ہے کہ لائن آف کنٹرول (ایل او سی) پر بھارتی فوج کی اشتعال انگیزی جاری ہے اور گزشتہ 24گھنٹوں کے دوران بھارتی فوج کی فائرنگ سے 2 سال کا بچہ شہید اور 4 شہری زخمی ہوئے ہیں، پاک فوج کی بھرپور جوابی کارروائی میں بھارتی چوکیوں کو نشانہ بنایا گیا ہے۔

وزیراعلی پنجاب نے بھارتی فوج کی گولہ باری سے زخمی ہونے والوں کی جلد صحت یابی کیلئے دعا بھی کی۔

عثمان بزدار کا کہنا تھا کہ اس وقت پوری دنیا کورونا وبا سے نمٹنے کیلئے یکسو ہے، متعصب مودی سرکار خطے میں امن کو نقصان پہنچانے کے درپے ہے۔

انہوں نے کہا کہ بھارت شہری آبادی کو نشانہ بنا کر عالمی قوانین اور انسانی حقوق کی دھجیاں اڑا رہا ہے۔