فرمان الہی
نماز کے اوقات
وزیراعلیٰ سندھ سید مراد علی شاہ کا کہنا ہے کہ آج سندھ میں کورونا وائرس سے ہونے والی 14 اموات پر دکھ ہے۔
وزیراعلیٰ سندھ سید مراد علی شاہ نے صوبہ سندھ میں کورونا وائرس کے حوالے سے اپنے بیان میں کہا کہ آج 453 نئے کیسز ظاہر ہوئے ہیں جبکہ کورونا کے باعث 14 اموات ہوئی ہیں۔
انہوں نے کہا کہ 24 گھنٹوں کے دوران سندھ میں کورونا کے مزید 3534 ٹیسٹ کیے گئے جس کے نتیجے میں 453 کیسز سامنے آئے ہیں۔ سندھ میں اب تک 76078 کورونا کے ٹیسٹ کیے ہیں، جس میں سے 9093 مریض ظاہر ہوئے ہیں۔
یہ بھی پڑھیے: سندھ: 24 گھنٹوں میں کورونا سے 11 اموات ہوئیں
مراد علی شاہ کے مطابق سندھ میں چوبیس گھنٹوں کے دوران 14 اموات ہونے سے انتقال کرنے والوں کی تعداد 171 ہوگئی ہے۔
مراد علی شاہ نے کہا کہ ہمارے پاس کورونا کے اس وقت 7069 مریض زیر علاج ہیں۔ جن میں سے 5858 مریض گھروں میں آئیسولیٹ ہیں، 683 مریض آئیسولیشن مراکز اور 528 اسپتالوں میں زیر علاج ہیں۔
87 مریضوں کی حالت تشویشناک ہے جن میں 14 مریض وینٹی لیٹرز پر ہیں۔
مراد علی شاہ نے بتایا کہ سندھ میں آج 122 کورونا کے مزید مریض صحتیاب ہو کر اپنے گھروں کو چلے گئے ہیں، اب تک سندھ میں کل 1853 مریض صحتیاب ہوچکے ہیں، جو کل مریضوں کا 20.4 فیصد ہے۔
یہ بھی پڑھیے: سندھ: 24 گھنٹوں میں کورونا سے 7 اموات ہوئیں
کراچی میں کورونا وائرس کی صورتحال سے متعلق اپنے پیغام میں مراد علی شاہ نے کہا کہ 453 نئے کیسز میں سے 335 کیسز کا تعلق کراچی سے ہے۔
ضلع وسطی کراچی میں 91، ضلع جنوبی میں 81 اور ضلع شرقی میں 69 نئے کیسز سامنے آئے ہیں۔ انہوں نے مزید کہا کہ ملیر اور کورنگی میں 33-33 جبکہ ضلع غربی میں 28 مزید کورنا کیسز رپورٹ ہوئے ہیں۔
مراد علی شاہ نے کہا کہ حیدرآباد میں 9، خیرپور میں 16، لاڑکانہ میں 35، کشمور میں 8، سکھر میں 12 اور سانگھڑ میں 3 مزید کیسز رپورٹ ہوئےہیں۔
انہوں نے اپنے بیان میں مزید کہا کہ 18 اپریل سے 5 مئی تک 2369 تارکین وطن واپس آئے ہیں، جن میں سے 515 کا کورونا ٹیسٹ مثبت آیا ہے۔
یہ بھی پڑھیے: 24 گھنٹوں میں کورونا کے مزید 8 مریض انتقال کر گئے، مراد علی شاہ
مراد علی شاہ نے کہا کہ لاڑکانہ اور خیرپور میں سب سے زیادہ کیسز آئے ہیں جبکہ کراچی ہمیشہ کی طرح مثبت کیسز میں بھی زیادہ ہے۔
وزیر اعلیٰ سندھ کے مطابق 19 مارچ کو کورونا کے باعث پہلی موت ہوئی تھی جس کے بعد 29 اپریل کو سب سے زیادہ 12 اموات رپورٹ ہوئیں اور آج 7 مئی کو سب سے زیادہ 14 اموات ہوئی ہیں۔
انہوں نے کہا کہ یہ بہت دکھ کی بات ہے میرا دل بوجھل ہے۔
