X
دنیا بھر میں جاری لاک ڈاؤن کے دوران اگر آپ کا بھی وزن بڑھ گیا ہے تو چند ورزشیں آ پ کی یہ مشکل دور کر سکتی ہیں جس کے لیے جم یا کسی پارک میں جانے کی بھی ضرورت نہیں۔
عالمی وبا کورونا وائرس کے پیش نظر اس وقت پوری دنیا میں کہیں سخت تو کہیں نرم لاک ڈاؤن جاری ہے جس کے سبب جم، پارکس بند ہیں، 24 گھنٹے گھر میں رہنے اور جسمانی سرگرمیاں نہ ہونے کی وجہ سے وزن میں تیزی سے اضافہ ہو رہا ہے، اگر آپ بھی اس صورتحال سے پریشان ہیں تو گھر میں رہتے ہوئے 4 ورزشیں ’برپیز‘، ’اسکواٹس جمپس‘، ’پلانک جیکس‘، ’لنجز ود این اوبلیق ٹوسٹ‘ کے ذریعے دنوں میں وزن میں کمی اور پیٹ کی چربی پگھلا سکتے ہیں ۔
ماہرین فٹنس کی جانب سے تجویز کی جانے والی مندرجہ ذیل یہ 4 ورزشیں ’فُل باڈی ایکسرسائز‘ ایک ساتھ پورے جسم کو متحرک کر کے تیزی سے وزن میں کمی لاتی ہیں اور دنوں میں بہترین نتائج دیتی ہیں ۔
برپیز
برپیز ایک ایسی ورزش ہے جس کے دوران پورا جسم سینہ ، پیٹ ، ٹانگوں اور بازؤں کے پٹھے ایک ساتھ متحرک ہوتے ہیں جس کے نتیجے میں زیادہ کیلوریز کو جلنے میں مدد ملتی ہے۔
برپیز کرنے کا طریقہ:
سیدھا کھڑے ہو جائیں اور اپنے بازوؤں کو اوپر کی جانب سیدھا کر لیں ۔
اب اسکواٹس یعنی بیٹھک کی پوزیشن میں آئیں اور اس کے بعد پلانک کی پوزیشن میں اپنے جسم کو بازوؤں اور پاؤں کی مدد سے زمین سے اوپر رکھیں ۔
اب اپنے پاؤں کو موڑیں اور چھلانگ لگاتے ہوئے دوبارہ کھڑے ہو جائیں ۔
یہ ورزش روزانہ 10 منٹ تک دو حصوں میں کریں، ہر حصے میں 10 بار یہی عمل دہرائیں ۔
برپیز کرنے کے بعد زیادہ سے زیادہ 5 منٹ کا وقفہ لیں، اس کے بعد اسکواٹس جمپ شروع کر دیں ۔
اسکواٹس جمپ
اس ورزش کے لیے سیدھا کھڑے ہو جائیں اور ہاتھوں کو اوپر کی جانب کھڑا کر لیں ، پاؤں کے درمیان 1 سے ڈیڑھ فٹ کا فاصلہ رکھیں ، اب چھلانگ لگاتے ہوئے نیچے کی جانب ایسے جائیں جیسے کسی کرسی پر بیٹھ رہے ہوں۔
اس عمل کو 10 منٹ میں دو بار دہرائیں، ہر سیٹ میں 10 اسکواٹس ضرور کریں ۔
پلانک جیکس
اس ورزش سے پیٹ کے پٹھے مضبوط ہوتے ہیں، چربی کو پگھلنے میں مدد ملتی ہے۔
عام پلانک ورزش کی طرح زمین پر اُلٹا لیٹ جائیں، اب اپنے ہاتھوں اور پاؤں کی مدد سے اپنا سارا جسم زمین سے اوپر اٹھا لیں۔
اپنے ہاتھوں پر گرفت مضبوط رکھتے ہوئے اب ’ جمپنگ جیکس ‘ کی طرح چھلانگ لگاتے ہوئے فاصلہ لائیں اور دوبارہ ٹانگوں کو ایک ساتھ ملا لیں۔
اس ورزش کو بھی 10 منٹ تک 2 سیٹ بنا کر کریں ، ہر سیٹ میں کم از کم 20 پلانک جیکس ضرور لگائیں۔
لنجز ود این اوبلیق ٹوسٹ (Lunges with an Oblique twist)
لنجز ود این اوبلیق ٹوسٹ ورزش براہ راست آپ کے پیٹ اور ٹانگوں کے پٹھوں کو متحرک کرکے انہیں سیڈول شکل دیتی ہے، اس ورزش سے برداشت پیدا ہوتی ہے اور خود کو متوازن رکھنے میں بھی مدد ملتی ہے ۔
لنجز ود این اوبلیق ٹوسٹ کا طریقہ:
اس ورزش کو کرنے سے پہلے اپنے پاؤں پر سیدھا کھڑے ہو جائیں اور آگے کی جانب ایک لمبا قدم بڑھائیں، اب پچھلی ٹانگ کے گھٹنے کے اوپر خود کو بیٹھنے میں مدد دیں، اور آگے والی ٹانگ کو موڑ لیں، اس کے بعد اپنے ہاتھوں کو آگے کی جانب سیدھا کرتے ہوئے دائیں اور بائیں جانب ہلکی رفتار سے موڑیں ۔
اب سیدھا کھڑے ہو جائیں، اس بار جو ٹانگ پہلے پیچھے تھی اب آگے کی جانب رکھیں اور آگے والی ٹانگ کو پیچھے کی جانب۔
اگر اس ورزش کے دوران آپ کو گرنے کا ڈر ہو تو کسی کرسی کا سہارا بھی لے سکتے ہیں۔
اس ورزش کو بھی لگاتار 10 منٹ تک کریں ۔
ورزش دہرانے کے درمیان کم سے کم 20 سے 30 سیکنڈ کا وقفہ ضرور لیں۔
تجویز
ایلکٹرولائٹس کے استعمال سے ورزش کے دوران متوازن رہنے اور کاکردگی میں بہتری آتی ہے اس لیے ورزش سے پہلے خود کو ہائیڈریٹ کرنا نہ بھولیں ، ورزش سے 30 منٹ پہلے سادہ پانی ، دودھ ، کوکونٹ ملک ، سبز چائے کے ساتھ تخم بالنگا یا نمک والی شکنجبین کا استعمال ضرور کریں ۔
